ԱՄՆ–ում շրջանային խորհրդի նիստն սկսվել է սատանային ուղղված աղոթքով

ԱՄՆ-ում սատանիստն աղոթքով է սկսել շրջանային խորհրդի նիստը։ Այս մասին հայտնում է Daily Mail-ը։

Երեքշաբթի օրը՝ հունվարի 16-ին, «Reno Satanic» կազմակերպության անդամ Ջեյսոն Միլլերը հայտնվել է Նևադա նահանգի Վաշո շրջանի շրջանային խորհրդի նիստին և աղոթք հնչեցրել, որն ավարտվել է սատանային ուղղված կոչով: «Մեր մոտալուտ ազատության համար այստեղ և հիմա՝ մեր ուրախության օրն է: Այստեղ և հիմա՝ դա մեր հնարավորությունն է։ Եկեք օգտագործենք այս փառահեղ օրն ու խորհրդավոր գիշերը՝ նշելու բնության աշխարհի հրաշալիքները, քանի որ մենք բոլորս նրա անսահման առեղծվածների մի մասն ենք: Մեզ լույս և գիտելիք բերող անպարտելի արևի ոգուն ասենք. «Փառք քեզ, սատանա»,– ասել է նա։

Դրանից հետո շրջանային խորհրդի անդամներից մեկը՝ Կլարա Անդրիոլան, ի նշան բողոքի, լքել է դահլիճը։ Ճակատագրի հեգնանքով, հենց 67-ամյա Անդրիոլան է նախաձեռնել նիստերն աղոթքով սկսելը։ Երբ Միլլերն ավարտել է ելույթը, Անդրիոլանվերադարձել է սենյակ և հայտարարել, որ ոչ մի կերպ չի աջակցում նրան։ Նա նաև խնդրել է իրավաբաններին պարզել, թե որքանով է օրինական պետական ​​կառույցներում նման ելույթներ ունենալը: