Զելենսկին հայտնել է Ուկրաինայի զոհերի թիվը

Ռուսական լայնամասշտաբ ներխուժման սկզբից ի վեր սպանվել է 31 հազար ուկրաինացի զինծառայող. մամուլի ասուլիսի ժամանակ հայտարարել է Ուկրաինայի նախագահ Վոլոդիմիր Զելենսկին, փոխանցում են միջազգային ԶԼՄ-ները։

«30 հազար ուկրաինացի զինվոր է զոհվել այս պատերազմում։ Ո'չ 300 հազար, ո'չ 150 հազար, ինչպես ստում են Պուտինը և նրա ստախոս շրջանակները: Բայց այս կորուստներից յուրաքանչյուրը մեծ կորուստ է մեզ համար»,- ասել է Զելենսկին:

Ուկրաինայի նախագահը հավելել է, որ չի կարող նշել վիրավորված ուկրաինացի զինվորների թիվը, քանի որ Ռուսաստանը կիմանա՝ քանի մարդ է «լքել մարտի դաշտը»։ Նա նաև չի նշել անհետ կորած զինվորականների թիվը։ Զելենսկու խոսքով՝ պատերազմի ընթացքում զոհվել է 180 հազար ռուս զինվոր։ «Ընդհանուր առմամբ, ներառյալ վիրավորները, այդ թիվը կազմում է 500 հազար մարդ»,-ասել է Զելենսկին։

Ուկրաինայի իշխանությունները պատերազմի սկզբից ի վեր երբեք չեն հայտնել զոհերի թիվը՝ վկայակոչելով ռազմական գաղտնիքները։ Ռուսաստանը նույնպես չի հայտնում իր զոհերի թիվը։