ՌԴ ճորտն էինք, բայց հիմա անկախ ենք, մենք ենք նշանակում մեր նախարարներին․ Գագիկ Մելքոնյան

Այսօր Ազգային ժողովում լրագրողները հարց ուղղեցին «Քաղաքացիական պայմանագիր» խմբակցության պատգամավոր Գագիկ Մելքոնյանին Ուկրաինայի նախագահ Վլադիմիր Զելենսկու՝ մարտ ամսին Հայաստան հավանական այցի վերաբերյալ․

«Եթե որոշի գալ, ուրեմն պիտի ընդունենք, ի՞նչ խնդիր ունենք մենք։ Մեզ չի հետաքրքրում, թե Ռուսաստանը ինչպես կարձագանքի, ինչպես չի արձագանքի, իրա գործնա։ Մեզ մեր երկրի շահերն են հետաքրքրում, մեր շահերը ոնց թելադրում են՝ մենք տենց էլ պիտի առաջնորդվենք»,- հարցի վերաբերյալ նման տեսակետով հանդես եկավ Մելքոնյանն ու լրագրողների մեկ այլ հարցին, ի՞նչ շահ ունի Հայաստանը Զելենսկու այցից, արձագանքեց․ 

«Ասում եմ՝ մեր երկրի շահը թելադրումա մեզ էն, ինչ-որ մենք պիտի անենք»։

Այս համատեքստում լրագրողները մտաբերեցին՝ 44-օրյա պատերազմի ընթացքում  Ուկրաինան ֆոսֆորային զենք էր մատակարարում Ադրբեջանին․

«Դուք կարո՞ղ եք ապացուցել, որ դա Ուկրաինան էր տվել, իրանք էլ ասում են, որ այդ զենքը եկելա Ռուսաստանից, էնպես որ մենք հաստատ հիմքեր չունենք երկու կողմից էլ»,- պատասխանեց պատգամավորը հավելելով՝ 

«Մենք ուզում ենք դառնանք անկախ երկիր, Ռուսաստանի ճորտն էինք, Ռուսաստանն էր մեզ թելադրում ամեն ինչ՝ որ երկրի հետ հանդիպենք, շփվենք, մեր նախարարները ովքեր պիտի լինեին, մեր երկում ով պիտի լիներ նախագահ։ Բայց հիմա մենք արդեն անկախ ենք, մենք ենք նշանակում մեր նախարարներին»,- համոզմունք հայտնեց նա ու ավելացրեց՝ մեր այլընտրանքային դաշնակիցը Ֆրանսիան է։