ՌԴ-ն 6 ամսով կարգելի բենզինի արտահանումը

ՌԴ վարչապետ Միխայիլ Միշուստինը հաստատել է բենզինի արտահանման արգելքը վեց ամսով՝ սկսած 2024 թվականի մարտի 1-ից, գրում է РБК-ն։ Որոշում է կայացվել նաև բորսայում դիզելային վառելիքի վաճառքի նորմատիվը հասցնել 16%-ի։

Արտահանման ժամանակավոր արգելքը չի տարածվում ԵԱՏՄ երկրներ, Մոնղոլիա, Ուզբեկստան, Աբխազիա և Հարավային Օսիա մատակարարումների համաձայնեցված ծավալների վրա։

Փոխվարչապետ Ալեքսանդր Նովակն ավեի վաղ վարչապետին է դիմել բենզինի արտահանման ժամանակավոր արգելք մտցնելու առաջարկով։ Փետրվարի 21-ի նամակում նա նշել է, որ շուտով ներքին շուկայում կսկսվի վառելիքի մեծ պահանջարկի սեզոն, որը կապված է գարնանային դաշտային աշխատանքների, նավթավերամշակման գործարաններում պլանային վերանորոգման, ինչպես նաև ամառային արձակուրդների հետ։

«Նավթամթերքի հապճեպ պահանջարկը հարթելու համար անհրաժեշտ է միջոցներ ձեռնարկել նավթամթերքի ներքին շուկայում գների կայունացման համար», - առաջարկել է Նովակը:

Փոխվարչապետ Նովակի ներկայացուցիչը РБК-ին հաստատել է, որ այս որոշումը կայացվել է։