Վրաստանի խորհրդարանում վիճաբանություն ու ծեծկռտուք է սկսվել (տեսանյութ)

Վրաստանի խորհրդարանում նիստը որոշ ժամանակով ստիպված ընդհատել են վիճաբանության պատճառով, որը սկսվել է այն բանից հետո, երբ ընդդիմությունը սկսել է քննադատել «Օտարերկրյա ազդեցության թափանցիկության մասին» վիճահարույց օրենքի վերաբաշխումը, գրում է Sputnik Georgia-ն։

Այն, որ իշխանությունները որոշել են վերադառնալ «օտարերկրյա գործակալների» մասին օրինագծին, որը պետք է հետ կանչվեր 2023 թվականի գարնանը՝ զանգվածային բողոքի ակցիաների ֆոնին, հայտնի է դարձել խորհրդարանի լիագումար նիստի մեկնարկից մեկ ժամ առաջ։

Վիճաբանությունը սկսվել է այն բանից հետո, երբ «Եվրոպական պատգամավորների» ներկայացուցիչ Խատիա Դեկանոիձեն, ում խոսք է տրվել Ընտրական օրենսգրքի փոփոխությունների քննարկման ժամանակ, բարձրացրել է «օտարերկրյա գործակալների» մասին օրինագծի թեման։

««Վրացական երազանքն» այժմ ցանկանում է «կոտրել» երկիրը։ Դուք այն քաղաքական ուժն եք, որը մինչ բանակցությունների մեկնարկը (Եվրամիությանն անդամակցելու մասին - խմբ.) վերադարձրել է ռուսական օրենքը»,- ասել է Դեկանոիձեն։

Խորհրդարանի նախագահ Շալվա Պապուաշվիլին ասել է, որ Դեկանոիձեն նման արտահայտություններով վիրավորում է պատգամավորներին։

Դեկանոիձեի խոսքերը, թե դա «ռուսական օրենք» է, կրկնել է մեկ այլ ընդդիմադիր պատգամավոր, ընդդիմադիր «Քաղաքացիներ» կուսակցության առաջնորդ Ալեկո Էլիսաշվիլին։

«Այս օրենքի վերադարձը վիրավորանք է բոլորիս համար»,- ասել է Էլիսաշվիլին։

Էլիսաշվիլիի խոսափողն անջատելուց հետո խորհրդարանի նախագահը ընդդիմադիրների հայտարարություններն անվանել է «հակավրացական քարոզչություն»։