Քաղաքացին պետք է հասկանա՝ բիզնեսն իր ռիսկն է. Նիկոլ Փաշինյան

«Ամենասկզբում, երբ այս աջակցության ծրագրերն իրականացնում էինք, ցանկանում էինք հնարավորինս ցածր շեմեր սահմանել, ցանկանում էինք հնարավորինս սոցիալական ուղղվածություն տալ: Հետո մենք տեսանք, որ այդ ծրագրերից ոչ ոք չի օգտվում: Եվ շփումների ընթացքում տեսանք, որ օգտվել ցանկացող բազմաթիվ մարդիկ չեն կարողանում, որովհետեւ մենք փոքր սահմանաչափեր ենք դրել: Նրանք, որոնք ուզում են աշխատել, չեն կարողանում, նրանց, ում ուզում ենք այդ ծառայությունը մատուցել, չեն ուզում: Հետևաբար` մենք քայլ-քայլ փոխում ենք մոտեցումը:

Եթե մարդն աշխատում է, ավելին է ուզում անել, մենք պետք է իրենց աջակցենք: Եթե մարդը գալիս, դիմում է գրում, պարտավորություն ստանձնում, որ այդ տարածքում է իր գործունեությունն իրականացնելու, ապա մենք տալու ենք կանխավճարի սուբսիդավորումը»,-այսօր, կառավարության նիստում ասաց վարչապետ Նիկոլ Փաշինյանը՝ սպանդանոցների հարցի քննարկման ժամանակ: Կառավարությունն այսօր որոշում ընդունեց՝ սուբսիդավորել լիզինգով շարժական եւ շարժական մոդուլային սպանդանոցների ձեռքբերման համար սահմանված 20 տոկոս կանխավճարի 80 տոկոսը: Պետությունն, աջակցության ծրագրի շրջանակներում կփոխհատուցի նաեւ լիզինգի տոկոսադրույքի 12 տոկոսը՝ 10 տոկոսի փոխարեն: Նիկոլ Փաշինյանը քաղաքացիներին զգուշացնում է՝ պետք է հասկանան, որ բիզնեսը ռիսկային է եւ իր բիզնեսն իր ռիսկն է, ուստի, բիզնեսի զարգացման, եկամտաբերության առումով հետագայում պետությունից ակնկալիքներ չպետք է ունենան: