Իսրայելը համաձայնել է ժամանակավոր հրադադարի

Իսրայելը համաձայնել է մի շարք մարդասիրական դադարների Գազայի հատվածում երեխաներին «Պոլիոմիելիտի» դեմ պատվաստելու համար: Այս մասին հայտնում է Առողջապահության համաշխարհային կազմակերպությունը (ԱՀԿ), գրում է BBC-ն:

Պատվաստումն իրականացվելու է երեք փուլով՝ կենտրոնական, հարավային և հյուսիսային Գազայում։ Յուրաքանչյուր փուլում ռազմական գործողությունները կդադարեցվեն երեք օրով՝ տեղական ժամանակով ժամը 06:00-ից մինչև 15:00-ը: Այս համաձայնությունը ձեռք է բերվել այն բանից հետո, երբ ՄԱԿ-ը հայտնել է, որ 25 տարվա մեջ առաջին անգամ Գազայի հատվածում օգոստոսի 16-ին «Պոլիոմիելիտով» հիվանդացության դեպք է գրանցվել։ Հիվանդության հետևանքով՝ 10 ամսական երեխա մասամբ անդամալույծ է դարձել:

Պատվաստումն իրականացվելու է Պաղեստինի առողջապահության նախարարության կողմից՝ ԱՀԿ-ի, ՅՈՒՆԻՍԵՖ-ի և ՄԱԿ-ի Մերձավոր Պաղեստինի Փախստականների օգնության և աշխատանքի գործակալության հետ համատեղ: Կազմակերպությունը մտադիր է պատվաստել Գազայի հատվածի երեխաների 90%-ին, ինչը անհրաժեշտ է վիրուսի տարածումը կանխելու համար։ Հնարավոր է, որ մարդասիրական դադարը շարունակվի չորրորդ օրը, եթե պատվաստումների նման մակարդակի հասնելու անհրաժեշտություն լինի։