Հարցրել եմ` բոլորը միաբերան ասում են` Բագրատ սրբազանը շատ լավն է Այս շարժումը ատելություն մաքրելու է. Կարինե Հարությունյան (տեսանյութ)

Լրագրող Կարինե Հարությունյանը ֆեյսբուքյան իր էջում գրում է․

 

«Այս ֆիլմը երեք տարի առաջ է նկարահանվել: Ֆեյսբուքում ընկերներիս մոտ տեսա: Բացահայտող ֆիլմ է Բագրատ Սրբազանի մասին:

Իրեն չեմ ճանաչել երբեք, 44-օրյա պատերազմի դրվագներում եմ հիշում իր նկարը, բայց առանձնապես կարեւորություն չեմ տվել, որ այս հոգեւորականը, չեմ վախենում այս բառից, բացառիկներից է: Դրանով հանդերձ, լավ հիշում եմ իր աչքերի լույսը. մի ուրիշ տեսակի լույս կա իր աչքերում:

Ֆիլմի մասնակիցները անկեղծորեն պատմում են նրա մասին, երեւում է, որ սիրով են պատմում:

Ի՞նչ կլինի Սրբազանի առաջնորդությամբ ընթացող շարժումը, ո՞ր հանգրվանում այն կավարտվի, դժվար է ասել:

Ի սկզբանե դրա մասին չեմ մտածել: Ինձ հետաքրքրել է երեւույթը. հոգեւորականը՝ քաղաքական շարժման առաջնորդ:

Կարծում եմ՝ ինքը, որպես հոգեւոր հովիվ, միայն ուզում էր ու փորձում էր օգնած լինել ծեծված իր ժողովրդին եւ այլ ճար չուներ, ճանապարհ չուներ ցույց տալու, ու ասաց՝ եկեք գնանք կառավարություն ու հարցնենք, թե ինչու են այսպես անում, ինչ անում են: Հետո դա վերածվեց քաղաքական շարժման, ու ինքն արդեն դրա մեջ էր:

Ֆիլմը դիտելով կարող եմ մտածել, որ երբ սկսում է մի բան, ձգտում է այն իր տրամաբանական ավարտին հասցնել (նրա մեջ զինվոր կա նստած նաեւ): Ըստ իս, սա է պատճառը, որ նա դեռ շարժումն առաջնորդում է:

Ի դեպ, Իջեւանում որեւէ մեկից որեւէ վատ բան չեմ լսել իր մասին: Բոլորը, ում հարցրել եմ, միաբերան ասում են նույնը՝ Բագրատ Սրբազանը շատ լավն է:

Սխալներ անո՞ւմ է սրբազանը այս քաղաքական ճանապարհին, իհարկե, անում է: Ու դա նորմալ է, նա քաղաքական լեզվին չի տիրապետում:

Ինչո՞ւ են նրա կողքին այն մարդիկ, որոնց մի մասը այնքան էլ լավ համբավ չունի: Որովհետեւ նրա կողքին չեն մարդիկ, որոնք քիչ թե շատ լավ համբավ ունեն:

Ի վերջո կամ միով բանիվ. երկրում ատելության այնքան մեծ չափաբաժին կա, որ ուտում է գրեթե բոլորին, խոսքը քաղաքական դաշտի դերակատարների եւ այդ դաշտի հետ այս կամ այն կերպ առնչվողների մասին է:

Այս շարժումը այդ ատելությունը մաքրելու մասին է:

Այս շարժումը հանդուրժողականության, սթափության, քաջության, ազնվության ու անկեղծության մասին է: Ով ինչպես է սա ընկալում կամ բացատրում, սրբազանին չի հետաքրքրում, ինքն իր գործն է անում: Սա իմ ընկալումն է:

Ափսոս է Բագրատ Սրբազանը: Սա էլ է իմ ընկալումը:

Որովհետեւ որքան էլ ինքը հավատում է, որ հնարավոր է մարդկանց փոխել ու դեպի լույսը տանել, կան մարդիկ, որոնց փոխելու համար անգամ ողջ կյանքդ բավական չէ, ավելի շուտ նրանք քո վերջը կտան:

Ցավոք այդպես է: Սա էլ է իմ ընկալումը»: