Ես հիմա, որ խոսում եմ, իմ տանն եմ և չգիտեմ, որ «որոնվում եմ»․ ի՞նչ միջադեպի մեջ է հայտնվել Տաճատ Վարդապետյանը

Երեկ մամուլում տեղեկություն տարածվեց, թե իբր ոստիկանության կողմից որոնվում են ԱԺ նախկին պատգամավոր Տաճատ Վարդապետյանն ու նրա որդին՝ Ասքանազ Վարդապետյանը։ 

Ըստ տարածված տեղեկության՝ հունիսի 13-ին, ժամը 18:45-ի սահմաններում ՀՀ ՆԳՆ Ոստիկանության օպերատիվ կառավարման կենտրոն է ահազանգել Երևանի բնակիչ 36-ամյա Զարզանդ Հակոբյանը և հայտնել, որ Սևաստոպոլյան 24 տան դիմաց իրեն է մոտեցել նույն հասցեի բնակիչ Տաճատ անունով ներկայացած անձը և ավտոմեքենան տեղափոխելու հետ կապված վիճաբանել է իր հետ, ապա իր հասցեին տվել հայհոյանքներ ու ոտքով հարվածել իրեն պատկանող ավտոմեքենային։ Ոստիկանությունն էլ դեպքի առթիվ փաստաթղթեր է ձևակերպել և փոխանցել Քննչական կոմիտեին։ 

Վիճաբանության առիթը եղել է այն, որ մի տղամարդ մեքենան կայանել էր նախկին պատգամավորի տան շքամուտքի մոտ՝ խոչընդոտելով դարպասով տան բակ ելումուտը, Տաճատ Վարդապետյանը գտել է նրան, խնդրել հանել մեքենան տարածքից, որից վիճաբանություն է սկսվել կողմերի միջև, և վերջում անծանոթ տղամարդը գնացել և ոստիկանությունում Վարդապետյանի «վրա» գրել է, թե իբրև վերջինս հարվածել է իր մեքենային։  Դրանից հետո մամուլում գրվեց, թե Տաճատ Վարդապետյանը որոնվում է ոստիկանության կողմից։

MediaHub-ը կապ հաստատեց «որոնվող» նախկին պատգամավորի հետ՝ հասկանալու, թե ի՞նչ է, իրականում, տեղի ունեցել և իսկապե՞ս իրեն որոնում են։

«Դա ակնհայտ սուտ է և հերյուրանք։ Ինձ համար և՛ զարմանալի է, և՛, ինչ-որ տեղ, նաև պարզ, թե ով ինչ հանձնարարություն է կատարում։ Ես որևէ բան չունեմ լրատվամիջոցների դեմ, բայց այդ լուրը գրողը, հավանավար մեծ դիտումներ հավաքելու նպատակով, առանց ճշտելու, տեղեկանալու՝ վերնագիր է ընտրել, որն ակնհայտորեն մարդու հեղինակության հետ է առնչվում»,- ասաց Տաճատ Վարդապետյանը։

-Հիմա Դուք չե՞ք որոնվում։

-Իհարկե, ոչ, չեմ որոնվում։ Ես հիմա, որ խոսում եմ, իմ տանն եմ և չգիտեմ, որ «որոնվում եմ»։ 

-Իսկ ի՞նչ է տեղի ուենցել, այդ դեպքում։

-Դուք չեք պատկերացնում, թե դա որքան շարքային, որքան անիմաստ դիպված է եղել։ Մեքենայով գալիս եմ տուն ու տեսնում եմ՝ դարպասիս դիմաց մի մեքենա է կանգնած։ Երկար ժամանակ փնտրելուց հետո մի կերպ հայտնվում է մեքենայի տերը, գալիս է, կողքի է քաշում մեքենան։ ճիշտն ասած՝ բավական զայրացա էդ վերաբերմունքից, վերջապես փորձում էի մտնել իմ տուն, ու չէի կարողանում։ Տուն մտնելուց հետո նորից էդ՝ դաստիարակության դեֆիցիտ ունեցող անձնավորությունը, որ ակնհայտորեն երևում էր՝ հեռու է բարեկրթությունից, նորից հետ է տալիս ու բերում իմ դարպասի դիմաց է կանգնեցնում։ Ասում եմ՝ «էստեղ մտնում-դուրս ենք գալիս, նոր մի ժամ քեզ էի փնտրում», ու ինքը շատ քամահրական, անճոռնի տոնով է արձագանքում, թե՝ «չե՞ս տեսնում, մարդ եմ սպասում»։ Կողքից հարևաններն էլ նկատեցին էդ մարդու անդաստիարակ վերաբերմունքը, ասացին՝ «թող, գնա էստեղից»։ Ու գիտե՞ք՝ որն է զավեշտը, որ տարածքում լիքը տեղ կար կանգնելու, որ կարող էր մի քանի մետր հեռու կայանել, բայց եկել դիտմամբ, թե չգիտես՝ ինչ նպատակով, հենց իմ տան դարպասի դիմաց էր կայանել։

-Իսկ Ձեզ ոստիկանություն հրավիրե՞լ են կամ եկել, տեսե՞լ են Ձեզ։ 

-Ինձ չեն հրավիրել ոստիկանություն, բայց եկել են տուն, մի քանի հարց են տվել, թե ինչ է եղել, ես էլ նույնաբովանդակ պատասխաններ եմ տվել, ինչ հիմա Ձեզ եմ ասում, ու որքանով հասկացա՝ այդ երկու անձնավորությունը, որ ոստիկանությունից եկել էին, նրանք էլ երևի իրենց մեջ գնահատական տվեցին, թե որքան անդաստիարակ է եղել այդ անձնավորությունը։ Եւ նա էնքան ինձանից, իմ ընտանիքից, իմ դավանած գաղափարական արժեքներից հեռու գոյական էր էդ թափթփուկը, կներեք, որ այդպես եմ ասում, որ ես նրա հետ առնչվելու, նրա հետ շփվելու ոչ մի հատման կետ չունեի։ 
Ու որ ասում են՝ «որոնվում է», ի՞նչ որոնվել, նա իր սև գործն արել է էդ պահին, և մի կես ժամ անց ոստիկանությունից եկան ինձ մոտ, հարցեր տվեցին և գնացին։ Ասեմ ավելին, դեպքը տեղի է ունեցել հունիսի 13-ին՝ վեց օր առաջ, և ես դրանից հետո՝ ամսի 15-ին, գնացել եմ իմ ծննդավայր Ջավախք, վերադարձել եմ 17-ին, և ես չգիտեի, որ ինձ «որոնում են»։ Իսկ որոնվող մարդու համար պետության դռներն էլ են փակում, որ չկարողանա երկրից դուրս գալ։ 

Վահե Մակարյան