ՌԴ-ի և ԿԺԴՀ-ի միջև ստորագրված պայմանագիրը նախատեսում է փոխադարձ օգնություն ագրեսիայի դեպքում. Պուտին
Տեսանյութեր
Ռուսաստանի Դաշնության և ԿԺԴՀ-ի կողմից ստորագրված Համապարփակ ռազմավարական գործընկերության համաձայնագիրը նախատեսում է փոխօգնության տրամադրում մասնակիցներից մեկի դեմ ագրեսիայի դեպքում, հայտարարել է ՌԴ նախագահ Վլադիմիր Պուտինը Հյուսիսային Կորեայի Պետական գործերի նախագահ Կիմ Չեն Ընի հետ բանակցություններից հետո, գրում է Interfax-ը։
«Այսօր ստորագրված համապարփակ գործընկերության համաձայնագիրը, ի թիվս այլ բաների, նախատեսում է փոխադարձ օգնության տրամադրում այս համաձայնագրի կողմերից մեկի դեմ ագրեսիայի դեպքում»,- ասել է Պուտինը։
Այս համատեքստում ՌԴ ղեկավարը ուշադրություն է հրավիրել ԱՄՆ-ի և ՆԱՏՕ-ի այլ երկրների հայտարարություններին՝ ռուսական տարածքը հարվածելու համար բարձր ճշգրտության հեռահար սպառազինության համակարգերի, F16 ինքնաթիռների և այլ նմանատիպ զենքերի ու սարքավորումների մատակարարման մասին։
«Սա միայն հայտարարություն չէ, սա արդեն տեղի է ունենում, և այս ամենը արևմտյան երկրների կողմից ստանձնած սահմանափակումների կոպիտ խախտում է տարբեր տեսակի միջազգային պարտավորությունների շրջանակում»,- ընդգծել է Պուտինը։
ՌԴ նախագահը նաև հայտարարել է, որ Ռուսաստանը չի բացառում ռազմատեխնիկական համագործակցության զարգացումը ԿԺԴՀ-ի հետ՝ կապված ստորագրված Ռազմավարական գործընկերության համաձայնագրի հետ։
Ամենադիտված 
Մնաս բարյավ. Րաֆֆի Հովհաննիսյան
