Խարկովին մոտենալու նպատակ չունենք. Պուտին

Ռուսաստանը Խարկովին մոտենալու նպատակ չունի, պետությունը սանիտարական գոտի է ստեղծում Ուկրաինայի կողմից շարունակվող գնդակոծությունների պատճառով։ Այս մասին Վիետնամում կայացած մամուլի ասուլիսի ժամանակ հայտարարել է ՌԴ նախագահ Վլադիմիր Պուտինը, գրում են միջազգային ԶԼՄ-ները։

«Վեց ամիս առաջ ես ասացի, որ եթե սահմանամերձ շրջաններում մեր բնակավայրերի գնդակոծումը շարունակվի, մենք ստիպված կլինենք ստեղծել անվտանգության՝ սանիտարական գոտի Ուկրաինայի տարածքում», - ասել է Պուտինը։

Նա ընդգծել է, որ ուկրաինական զինված ուժերի գնդակոծությունները շարունակվել են, ուստի Ռուսաստանը սկսել է սանիտարական գոտի ստեղծել։ Նրա խոսքով, արևմտյան երկրները դրդում են Ուկրաինային, որ ուկրաինական զինված ուժերը ամեն գնով «սեղմեն» ՌԴ ԶՈւ ստորաբաժանումները պետական ​​սահմանի վրա։ Նրանք ծրագրում են սա ներկայացնել՝ որպես մեծ հաջողություն 2024 թվականի համար՝ կապված ՆԱՏՕ-ի առաջիկա գագաթնաժողովի և ԱՄՆ ընտրությունների հետ։

Մայիսին Խարկովի մարզում սրվեցին մարտերը։ ՌԴ պաշտպանության նախարարությունը հայտնել է, որ վերահսկողության տակ է վերցրել մի շարք բնակավայրեր, այդ թվում՝ Բորիսովկան, Պլետնևկան, Կրասնոյեն և Բուգրովատկան։ Մայիսի 28-ին Տաշքենդում մամուլի ասուլիսի ժամանակ Պուտինը չի բացառել Մոսկվայի նոր որոշումները սանիտարական գոտու վերաբերյալ, եթե Ուկրաինան կիրառի հեռահար ճշգրիտ զենք։