Կայացել է Ծինփին-Մակրոն-Ֆոն դեր Լյայեն հանդիպումը

Փարիզում եռակողմ հանդիպում է կայացել Չինաստանի նախագահ Սի Ծինփինի, Ֆրանսիայի նախագահ Էմանուել Մակրոնի և Եվրահանձնաժողովի ղեկավար Ուրսուլա ֆոն դեր Լյայենի միջև։ Սին ասել է, որ ԵՄ-ն և Չինաստանը պետք է շարունակաբար նպաստեն համաշխարհային խաղաղությանը, գրում է Kommersant-ը:

«Չինաստանը և ԵՄ-ն պետք է ձևավորեն ռազմավարական կոնսենսուս, զարգացնեն ռազմավարական համագործակցությունը, նպաստեն Չինաստան-ԵՄ հարաբերությունների առողջ և կայուն զարգացմանը և շարունակաբար նոր ներդրում ունենան համաշխարհային խաղաղության և զարգացման գործում»,- ասել է Ծինփինը։ Նա հավելել է, որ Չինաստանը միշտ դիտարկել է Եվրոպայի հետ հարաբերությունները ռազմավարական և երկարաժամկետ տեսանկյունից: Նա հույս է հայտնել, որ Պեկինի և Փարիզի միջև համագործակցությունը կզարգանա։

Էմանուել Մակրոնը, ինչպես հաղորդում է BFMTV-ն, հանդիպման ժամանակ ասել է, որ Եվրոպայի և Չինաստանի միջև երկխոսությունը «անհրաժեշտ է առավել քան երբևէ»՝ պայմանավորված աշխարհում տիրող իրավիճակով։ Նա Պեկինի հետ համակարգումը որոշիչ է անվանել Ուկրաինայի և Մերձավոր Արևելքի հակամարտությունների հարցերում։

Ուրսուլա ֆոն դեր Լյայենը ուշադրություն է հրավիրել համաշխարհային շուկայի շուրջ ստեղծված իրավիճակի վրա։ Նա Չինաստանի հետ հարաբերություններն անվանել է ամենաբարդը և, միևնույն ժամանակ, կարևորագույններից մեկը։