Քննչական Կոմիտեն շարունակում է սատանաների որսը․ «Հրապարակ»

Այսօր ՀՀ Քննչական կոմիտեն հերթական հաղորդագրությունն է տարածել, թե շարունակում ենք պայքարը «պետության, սահմանադրական կարգի հիմունքների և հասարակական անվտանգության դեմ ուղղված հանցագործությունների» դեմ եւ դրա շրջանակներում խիստ կարեւոր գործ ենք արել` հայտնաբերել ենք YouTube-ում «քաղաքացու կողմից առերևույթ բռնություն գործադրելու հրապարակային կոչեր անելու, բռնությունը հրապարակայնորեն արդարացնելու կամ քարոզելու վերաբերյալ հայտարարություններ»: 

Պարզվում է 2024 թ. ապրիլի 25-ին ինչ որ մեկը (շատ հետաքրքիր կլիներ իմանալ՝ ով) հաղորդում է ներկայացրել, որ մի օգտատեր իր անվամբ էջով հեռարձակվող եթերների ժամանակ կատարել է բռնություն գործադրելու հրապարակային կոչեր, բռնությունը հրապարակայնորեն արդարացնելու կամ քարոզելու վերաբերյալ հայտարարություններ։ Եւ Քննչական կոմիտեն տիտանական ջանքերի գնով հայտնաբերել է, որ դա 1972թ. ծնված Վ․Հ․-ն է, ով, ուշադրություն` 2023թ․ սեպտեմբերին լքել է ՀՀ տարածքը: 

Բայց Քննչական կոմիտեն չի հուսահատվել` «հակաիշխանական հայացքներ» ունեցող այդ անձի նկատմամբ քրեական հետապնդում են սկսել` քրեական օրենսգրքի 330-րդ հոդվածի 2-րդ մասի 3-րդ կետով, ձերբակալելու որոշում կայացրել եւ հետախուզում հայտարարել: Եւ հիմա ամեն ինչ անում են, որ նրան գտնեն: 330 հոդվածը այս իշխանությունների նոու-հաուն է՝ տեղեկատվական ու հաղորդակցական տեխնոլոգիաների օգտագործմամբ բռնության կոչերը, որի տակ կարող են ամեն ինչ մտցնել, ինչպես արել են Նարեկ Սամսոնյանի եւ Վազգեն Սաղաթելյանի դեպքում։ 

Գոնե ամաչեին` չգրեին «հակաիշխանական հայացքներ ունեցող», չբացահայտեին, որ իրենք իշխանությունների բութ գործիքն են` քաղաքական հետապնդումներ իրականացնող: Բայց սա էլ էական չէ` էականն այն է, որ սրանք երեւի տեղյակ չեն, թե YouTube-ում ինչ է կատարվում, եւ  առհասարակ՝ ինչ է կատարվում համացանցում․ լինի ֆեյսբուք, յութուբ, տիկ-տոկ, թե ԶԼՄ-ների ֆեյսբուքյան էջեր։ 

Արգիշտի Քյարամյանին հավանաբար թվում է, թե ինքը մենակ կկարողանա անել այն, ինչ մարդկությունը չի կարողանում անել վերջին տասնամյակներին՝ կանխել համացանցի ագրեսիվ խոսքը, բռնության կոչերը։ Նրան թվում է, թե դրսում գտնվող մի յութուբյան օգտատիրոջ դեմ հարուցված այս գործով կկարողանա վախեցնել ընդդիմադիր հայացքներ ունեցողներին եւ կկարողանա ստիպել, որ իշխանության հասցեին միայն գովեստներ գրեն։ Դե իսկ Հայաստանից հեռացած ինչ որ մի օգտատիրոջ գտնելը սատանա փնտրելու նման մի բան է՝ ինչպես խոտի դեզի մեջ ասեղ փնտրես։

«Հրապարակ օրաթերթ»