Բայդենի մի զանգը Սի Ծինփինին ամեն ինչ փոխել է. The Washington Post

Ուկրաինայի պատերազմի հենց սկզբում Չինաստանը նախագահ Վլադիմիր Պուտինի խնդրանքով պատրաստվում էր զենք մատակարարել Ռուսաստանին, սակայն ԱՄՆ-ի նախազգուշացումից հետո փոխեց պլանները։ Այս մասին Washington Post-ի սյունակագիր Դեյվիդ Իգնատիուսին հայտնել են  աղբյուրները։

Նրանք ասել են, որ զենքն արդեն «պատրաստ է առաքման», երբ Չինաստանի նախագահ Սի Ծինփինը զանգ է ստացել ԱՄՆ նախագահ Ջո Բայդենից՝ զգուշացնելով նրան Ռուսաստանին օգնելու հետևանքների մասին: Սա առաջացրել է Չինաստանի առաջնորդի «զայրացած արձագանքը», որը մտածում էր՝ արդյոք Բայդենը սպառնում է իրեն։ Այդ ժամանակից ի վեր Պեկինը «ձեռնպահ է մնացել ուղիղ առաքումներից»։

Միևնույն ժամանակ, ըստ նրանց, Չինաստանի ղեկավարը հանձնարարել է նախկին փոխվարչապետին և Արևմուտքի հետ բանակցություններում իր ամենավստահելի ներկայացուցիչներից մեկին՝ Լյու Հեին, վերահսկել օգնությունը Ռուսաստանի ռազմական ջանքերին։ Միաժամանակ, Չինաստանը ուղերձ է հղել Ուկրաինային և նրա եվրոպացի դաշնակիցներին՝ առաջարկելով ռազմական հակամարտության հնարավոր կարգավորում։

Զանգը, ըստ The Washington Post-ի, տեղի է ունեցել 2022 թվականի մարտի 18-ին։ Սի Ծինփինը և Ջո Բայդենը զրուցել են գրեթե երկու ժամ։ Սպիտակ տան կայքում տեղադրված հաղորդագրության համաձայն՝ զրույցի ընթացքում Բայդենը Չինաստանի ղեկավարին ներկայացրել է ԱՄՆ-ի և նրա դաշնակիցների տեսակետը Ռուսաստանի և Ուկրաինայի միջև ռազմական հակամարտության վերաբերյալ, ինչպես նաև զգուշացրել է Պեկինին հետևանքների մասին, եթե նա օգնություն ցուցաբերի Մոսկվային։