Hurriyet. Թուրքիայի օմբուդսմենը հայտնվել է ուժեղ ճնշման տակ Դինքի նկատմամբ իր վճռի համար

Թուրքիայում մեծանում է ճնշումը նորընտիր առաջին օմբուդսմենի՝ Մարդու իրավունքների պաշտպանի նկատմամբ: Հայկական արմատներ ունեցող թուրք լրագրող Հրանտ Դինքի ընտանիքը նրան մեղադրում է նրա ընդունած վճռի համար՝ կոչ անելով հրաժարական տալ. գրում է թուրքական Hurriyet-ը:

Մեհմեթ Նիհաթ Օմերօղլուն Գերագույն վերաքննիչ դատարանի պաշտոնաթող անդամ է, ով հայտնվել է ուժեղ ճնշման տակ վերաքննիչ դատարանի ընդունած վճռի մեջ իր դերի համար: Նա այն դատավորներից մեկն էր, ով 2006թ. հաստատեց Դինքի նախորդ մեղադրանքը Թուրքիայի Քրեական օրենսգրքի 301-րդ հոդվածի հատկանիշներով, որն օրենքից դուրս է հայտարարում նրանց, ովքեր «հրապարակայնորեն վիրավորում են թուրքական պետությանը, ժողովրդին». հիշեցնում է Hurriyet-ը:

Հրանտ Դինքը սպանվել է 2007թ. հունվարի 19-ին՝ երկար հետապնդման գործընթացից հետո, 301-րդ հոդվածի հատկանիշներով, որը փոփոխվել է Թուրքիայի խորհրդարանի կողմից նրա սպանությունից հետո:

Հիշեցնենք, որ Հրանտ Դինքի եղբայր Խոսրովը (Օրհան Դինք) հանդես էր եկել Թուրքիայի օմբուդսմենի պաշտոնին Նիհաթ Օմերօղլուի նշանակության վերաբերյալ խոսքով.

«Մենք գիտենք, որ տարիներ առաջ թուրքական արդարադատության ընդունած որոշումը դարձավ Դինքի մահվան հրամանը: Ընդ որում, այս որոշմամբ դատարանը ոչ միայն վատ դրության մեջ գցեց Թուրքիային, այլև մեր եղբորը վերցրեց մեզանից: Որպես արդյունք՝ դատական գործը հասավ Մարդու իրավունքների Եվրոպական Դատարան, որը Դինքի հրապարակումը որակեց իբրև խոսքի ազատություն, որտեղ չկային թուրքերին նվաստացնող և վիրավորող տարրեր»:

Ինչպես թուրքական Hurriyet-ն է ավելացնում, Հրանտ Դինքի եղբայրը նշել է, որ «Մեղավորներին պատասխանատվության ենթարկելու փոխարեն նրանք պարգևատրվում են»:

Օմերօղլուն նշանակվել է խորհրդարանի կողմից որպես Թուրքիայի առաջին օմբուդսմեն նոյեմբերի 27-ին:

Պաշտոնաթող դատավորը քննադատություններին ի պատասխան նշել է, որ նա նույնիսկ տեղյակ չէր, որ գործի մեջ գրված անունը «Հրանտ» էր, քանի որ գրված էր «Ֆիրաթ»՝ գրանցված փաստաթղթերում Դինքի պաշտոնական անունը. գրում է թուրքական Radikal-ը:

Թուրքիայի հիմնական ընդդիմադիր կուսակցությունը՝ «Հանրապետական ժողովրդի» կուսակցությունը (CHP) ևս կոչ է անում Օմերօղլուին հրաժարական տալ: