Տյումենի մարզում գետերի վարարումների պատճառով հարյուրավոր տներ են հեղեղվել

Տյումենի մարզում Իշիմ և Տոբոլ գետերի վարարման պատճառով 47 բնակավայրերի ավելի քան 380 բնակելի շենք է հեղեղվել։ Այս մասին հայտնում է ՌԴ ԱԻՆ-ը։

Գերատեսչության տվյալներով՝ Իշիմ գետի ջրի մակարդակը Իլյինկա և Աբացկոե գյուղերի տարածքներում շարունակում է նվազել։ Վիկուլովսկի շրջանում ջրի մակարդակը շարունակում է բարձրանալ։

«47 բնակավայրերում ջրածածկ են մնացել 385 բնակելի շենք, 345 ամառանոց, 3232 կենցաղային հողատարածք, ճանապարհների 35 հատվածներ»,- ասվում է հաղորդագրության մեջ։

Նշվում է, որ ջրածածկ բնակավայրերում կազմակերպվել են նավակներով անցումներ, իսկ ԱԻՆ աշխատակիցներն օգնել են տեղի բնակիչներին տարհանել։