The Telegraph. Մեծ Բրիտանիան և Ֆրանսիան իրենց մոտ են կանչել Իսրայելի դեսպաններին

Մեծ Բրիտանիան և Ֆրանսիան բացատրություններ ստանալու նպատակով իրենց մոտ են կանչել Իսրայելի դեսպաններին՝ բողոքելով Իսրայելի կողմից բնակավայրեր կառուցելու ծրագրի ընդլայնման դեմ. գրում է The Telegraph-ը:

«Լոնդոնում Իսրայելի դեսպան Դենիել Թոբը կանչվել է Ֆորին օֆիս այս առավոտյան Մերձավոր արևելքի հարցերով նախարար Էլիսթեր Բերթի հետ հանդիպման համար»,-նշված է Ֆորին օֆիսի հայտարարության մեջ:

Մեծ Բրիտանիայի Ֆորին օֆիսը՝ արտգործնախարարությունը, մինչ դեսպանին կանչելը երկուշաբթի օրը հայտարարել էր, որ նախատեսում էր «ուժեղ պատասխան» տալ Իսրայելի՝ նոր բնակավայրեր կառուցելու ծրագրերին՝ սպառնալով իր դեսպանին հետ կանչել Լոնդոն:

«Արտգորնախարար Ուիլյամ Հեյգը մշտապես շատ հստակ նշել է, որ բնակավայրերի կառուցումը, ինչպես օրինակ, Իսրայելի կառավարության վերջին որոշումը՝ կառուցել 3000 նոր բնակավայրեր, սպառնում է «երկու պետություն» ձևաչափով խնդրի կարգավորմանը և դժվարացնում բանակցությունների միջոցով առաջընթացի հասնելու հնարավորությունը»,-ասված է Թել-Ավիվում բրիտանական դեսպանության տարածած հատարարության մեջ:

Հիշեցնենք, որ Իսրայելի կառավարությունը նոյեմբերի 30-ին հայտարարել է Արևելյան Երուսաղեմում և Հորդանան գետի արևմտյան ափին 3000 հրեական բնակավայրերի շինարարության նախաձեռնության մասին՝ ի պատասխան Պաղեստինի՝ ՄԱԿ-ի ոչ անդամ, դիտորդ պետության կարգավիճակ ստանալուն:

Միաժամանակ Ֆրանսիան երկուշաբթի օրը ևս իր մոտ է կանչել Փարիզում Իսրայելի դեսպանին նույն պատճառով, ինչպես նշված է դեսպանության տարածած հայտարարության մեջ:

Ինչպես գրում է իսրայելական Haaretz թերթը, մինչ այդ Ֆրանսիան ևս մտածում էր իր դեսպանին հետ կանչել:

«Գոյություն ունեն այլ ձևեր, որոնք կարող են արտահայտել մեր անհավանությունը»,-նշվում է Ֆրանսիայի արտգորնախարարության`Կե դ'Օրսեի հայտարարության մեջ:

Սակայն երկու դեսպանություններն էլ հրաժարվել են մեկնաբանություններ կատարել այդ մասին: Համաձայն մի անանուն դիվանագիտական աղբյուրի` Լոնդոնն այսօր ավելի ուշ կորոշի իր դեսպանին հետ կանչելու հետ կապված հարցերը: