ՄԱԿ-ը հետ է կանչում իր աշխատակիցներին Սիրիայից. Der Spiegel

Սիրիայում ծավալված քաղաքացիական պատերազմի հետևանքով ի հայտ եկած վտանգավոր իրավիճակը հաշվի առնելով՝ ՄԱԿ-ն ու Եվրամիությունը որոշել են նվազեցնել իրենց գործունեության ակտիվությունն այդ երկրում. գրում է գերմանական պարբերականը: Վաշինգտոնն իր հերթին մտահոգություն է հայտնում, որ ճնշման տակ հայտնվելով՝ Ասադի ռեժիմը կարող է քիմիական զենք օգտագործել:

Սիրիայում աճող բռնությունների սպառնալիքից ելնելով՝ Միավորված ազգերի կազմակերպությունը Սիրիայում լոկալ գործունեություն իրականացնող ոչ հիմնական իր աշխատակիցներին հետ է կանչել այդ երկրից: Բացի այդ, ծավալվող բոլոր տիպի ակտիվ գործունեությունները միջազգային կազմակերպության կողմից առաջին անգամ ժամանակավորապես դադարեցվելու են. hայտարարել է ՄԱԿ-ի ներկայացուցիչը Նյու Յորքում: Դամասկոսում ՄԱԿ-ի առաքելությունն իրականացնող ղեկավարները խորհրդակցություն են գումարելու, որպեսզի որոշեն, թե որ աշխատակիցները պետք է լքեն Սիրիան: Մինչև շաբաթվա վերջ ՄԱԿ-ի 25-100 աշխատակից պետք է հեռանա Սիրիայից:

Այս մասին հայտարարությունն արվել էր այն բանից հետո, երբ ՄԱԿ-ի 2 աշխատակիցներ Դամասկոսից  դեպի միջազգային օդանավակայան տանող ճանապարհին վերջին օրերս այնտեղ ընթացող կատաղի կռիվների արդյունքում ծանր վիրավորվել էին: Վերջիններս ավստրիացի խաղաղապահներ էին:

ՄԱԿ-ի մնացյալ աշխատակազմն այսուհետ սահմանափակվելու է միայն մայրաքաղաք Դամասկոսում ծավալած ակտիվությամբ:

Իր հերթին Եվրամիությունը երկուշաբթի օրը հայտարարել էր, որ պատրաստվում է սահմանափակել իր գործունեությունը Սիրիայում: ԵՄ ներկայացուցիչը նշել է, որ իրենց ակտիվությունը հասցվելու է նվազագույնի: ԵՄ-ն իր գրասենյակն ուներ Դամասկոսում, որը բաց էր և գործում էր հակամարտության ողջ ընթացքում: