Իրանը Սիրիայից դուրս է բերում ԻՀՊԿ սպաների մի մասին՝ Իսրայելի հնարավոր հարվածի պատճառով

Իրանը որոշել է կրճատել իր ռազմական խորհրդատուների թիվը Սիրիայում գտնվող Իսլամական հեղափոխության պահապանների կորպուսի (ԻՀՊԿ) սպաների շրջանում՝ Իսրայելի հնարավոր պատասխանի հետ կապված մտավախության պատճառով: Այս մասին հայտնում է The Wall Street Journal-ը (WSJ)՝ հղում անելով աղբյուրներին։

Ըստ սիրիական հետախուզական ծառայություններում հրատարակության զրուցակիցների՝ Իսլամական հեղափոխության պահապանների կորպուսը արաբական հանրապետությունից դուրս է բերել միայն բարձրաստիճան զինվորականներին։ Հաղորդվում է, որ միջին մակարդակի սպաները կմնան երկրում, բայց կփոխեն իրենց գտնվելու վայրը։ Հրատարակությունը պնդում է, որ Սիրիայում իր սպաների ներկայությունը կրճատում է նաեւ լիբանանյան շիական «Հեզբոլլահ» շարժումը, որը համարվում է Թեհրանի տարածաշրջանային դաշնակիցը։

Սիրիայում իրանական թիրախների վրա հարձակումը, ըստ WSJ-ի, Իսրայելին թույլ կտա «պատասխան հարված» հասցնել՝ միաժամանակ խուսափելով տարածաշրջանում լայնամասշտաբ պատերազմից։ Արաբ պաշտոնյաները թերթին ասել են, որ հրեական պետության հարվածը կարող է սահմանափակ լինել, և Իսրայելը, հավանաբար, կզգուշացնի իր տարածաշրջանային արաբ դաշնակիցներին՝ նախքան Իրանին հակահարված տալը: