«Չեն հանձնվելու». ուսանողության շրջանում պրոցեսներ են եռում

Այն բանից հետո, երբ մամուլում հայտնվեց Ակադեմիական քաղաքի ծրագրի շրջանակներում միավորվող բուհերի ու գիտական կազմակերպությունների ցանկը, մշակութային հանրությունն սկսեց տարբեր հարթակներում բողոքի ձայն հնչեցնել։ Առավել սուր են կրքերը Երեւանի Կոմիտասի անվան պետական կոնսերվատորիայում: Թեև Կոնսերվատորիայի ուսանողներն արդեն իսկ հրապարակավ հայտարարել են այս որոշման հետ իրենց անհամաձայնության մասին, կան տեղեկություններ, որ դասախոսական կազմը դեռևս ներքին վախերից դրդված չի կանգնում երիտասարդների արդար պահանջների կողքին: Օրինակ՝  Կոնսերվատորիայի ռեկտոր Սոնա Հովհաննիսյանը լրատվամիջոցներից մեկին տված հարցազրույցում  կարծիք էր հայտնել, որ  բուհերի միավորման շուրջ «ահավոր բորբոքումները» սկսվել են «թյուր տեղեկատվությունից» և փորձել էր հանգստացնել ուսանողներին, ինչը նրա մոտ, կարծես թե, չի ստացվել:

Լուրեր.com-ին տեղեկություններ են հասել առ այն, որ այս պահին որոշակի խմորումներ են գնում՝ Կոնսերվատորիայի ուսանողները չեն պատրաստվում հանձնվել: Կան նաև տեղեկություններ, որ վերջիններիս կարող է միանալ նաև Հայաստանի Ազգային Պոլիտեխնիկական համալսարանը, իսկ հիմնական գործընթացները սկսվելու են մայիսին: Անկնայտ է, որ ուսանողությունն սկսել է գիտակցել՝ 2018-ին իրենց պարզապես օգտագործել են, տվել գեղեցիկ խոստումներ, իսկ այսօր կանգնեցրել դաժան իրականության առջև: Երիտասարդներն այսօր ստիպված են կյանքի գնով անպաշտպան և թերի կահավորված սահմաններ պահել, դա էլ բավական չէ՝ վերջիններիս համար իշխանությունները նորանոր խնդիրներ են ստեղծում՝ ի դեմս օպտիմալացումների և ԲՈՒՀ-րի շենքերի վաճառքի: Ցավալի է, որ ուսանողների արդար պահանջներին չի շտապում միանալ դասախոսական անձնակազմը, որը թերևս ստացած մի քանի տասնյակ հազարի հասնող աշխատավարձը շատ ավելի է կարևորում, քան երիտասարդ սերնդի, իրենց սաների և ի վերջո՝ մեր երկրի ապագան: