Սրբազան շարժումն ու արցախցիները․․․ MediaHub

Տավուշի հոգևոր թեմի առաջնորդ Բագրատ արքեպիսկոպոս Գալստանյանի առաջնորդությամբ «Տավուշը հանուն հայրենիքի»՝ ավելի ուշ «Սրբազան» անունը ստացած շարժումն արդեն 5 ամիս է, ինչ շարունակում է հանրահավաքներ, անհնազանդության ակցիաներ ու հանդիպումներ կազմակերպել հանրապետությունում, հանրության տարբեր շրջանակների հետ։

«Ես նկատել եմ, որ տեղահանությունից հետո հայաստանաբնակ մեր հայրենակիցների վերաբերմունքն արցախցիների հանդեպ կտրուկ փոխվել է Սրբազան շարժմանը մասնակցելու համար։ Իսկ ովքե՞ր էին մասնակցում այդ հանրահավաքներին, ընդամենը մի քանի հարյուր հոգի, որոնց ականջները շոյել են Սրբազանի` «Ոսկեպարով գնալու ենք Արցախ» խոսքերը»,- MediaHub-ի հետ զրույցում նշում է ակտիվիստ Արամ Ենոքյանը։ 

«Բագրատ Սրբազանը, որի անձի հանդեպ ես միայն հարգանք ունեմ, տարբեր բեմահարթակներից ընդգծում է արցախցիների ներկայությունը, ինչն ավելի շատ պառակտում է ժողովրդին։ Որևէ այլ երկրում այսքան քաղաքականացված ժողովրդի չես հանդիպի, որքան այստեղ՝ Հայաստանում»,- նկատեց նա։

Արամի խոսքով՝ խտրական վերաբերմունքին նպաստել են նաև Նիկոլ Փաշինյանի ու իշխանական վարչախմբի ելույթները, Հանրային հեռուստատեսության եթերում ու պրոիշխանական կայքերում պարբերաբար տարվող ատելության քարոզը։

«Եթե օրինակելի ծնողներից անորակ երեխա է ծնվում, ծնողները դա չեն հանրայնացնում, այլ փորձում են դաստիարակել երեխային, ճիշտ ուղու վրա դնել, և հակառակը՝ անորակ ծնողներից կարող է օրինակելի երեխա ծնվել։ Նիկոլ Փաշինյանը, ուզենք-չուզենք, երկրի ղեկավարն է։ Այդ մարդը փոխանակ դաստիարակի իր ժողովրդին, պառակտում է մտցնում, շարժմանը մասնակցելու համար պիտակավորում մարդկանց, մինչդեռ, մարդն ազատ է իր ընտրության մեջ։ Կարելի է առանձնացնել, ենթադրենք՝ «մի խումբ արցախցիներ», «Արցախի անհաջող իշխանություններ» արտահայտությունները, բայց չասել ընդհանուր արցախցիները, սխալ է բոլորին դիտարկել նույն հարթության վրա։ Հետո նեղանում ենք, թե ինչո՞ւ է ժողովուրդն այսքան տգետ։ Մեզ այդպես են դաստիարակում ամենաբարձր մակարդակով»,- ասաց մեր զրուցակիցը` ափսոսանք հայտնելով, որ տեղահանված հայրենակիցներին քաղաքական ուժերն օգտագործում են իրենց դիրքերն ապահովելու համար։ 

Նշենք, որ մայիսին մեկնարկած շարժումը թեպետ չի հասել իր հանգրվանին, Բագրատ Սրբազանի աջակիցները հույս են հայտնում, որ այն կավարտվի հայրենիքի փրկության հաղթանակով։

Այսօր երեկոյան Բագրատ Սրբազանը հերթական հանրահավաքն է հրավիրել, որով մեկնարկելու է պայքարի նոր փուլը: