ԱԱԾ-Ն սկսել է աշխատել դպրոցի ուսմասվարի մեթոդներով

Մեր տարածաշրջանում նոր կոնֆլիկտ է հասունանում: ՀՀ ԱԱԾ-ն և հայ ժողովուրդը հայտնվել են միմյանցից կես քայլ հեռավորության վրա և ընդամենը մի փոքրիկ կայծ է պետք, որ կողմերը ոչնչացնեն իրար: Ստեղծված իրավիճակում նախահարձակ կողմը ԱԱԾ-ն է, և պիտի ենթադրել, որ ՀՀ գործող իշխանության այդ սրբության սրբոցը պատրաստ է կրելու հնարավոր բախումների ողջ պատասխանատվությունը:

Դուք կարդացե՞լ եք դրանց հաղորդագրություն-հաթաթան: Նա ով չի կարդացել, թող կարդա, իսկ ով կարդացել է ու անհրաժեշտ հետևություններ դեռ չի արել, թող անի: Լրիվ Նիկոլի ոճի մեջ են՝ կփռենք ասֆալտին, կծեփենք պատերին, բորդյուր լիզել կտանք, կբռնենք՝ կշինենք և այսպես շարունակ: Ժողովրդին կոչ են արել խաղաղ գալ հանրահավաքի և խաղաղ գնալ տուն, չփորձել իշխանափոխության, իշխանությունը վերցնելու փորձեր անել, ոտնձգություն չկատարել Սահմանադրության ու սահմանադրական կարգի դեմ… Մեղա, մեղա: ՀՀ ԱԱԾ-ն, սովորաբար ժողովրդից շուտ է իմանում, թե ինչ է ուզում անել ժողովուրդը: Այո, սովորաբար դա հենց այդպես էլ լինում է, որովհետև ԱԱԾ տարբեր ծառայություններ մշտապես աչքի ու ականջի ֆունկցիա են կատարում ողջ կառույցի համար: ԱԱԾ-ն, սովորաբար, հաթաթաներ չի տալիս, թե այս չանեք, այն չանեք: ԱԱԾ-ն իմանում է, թե ինչ են ուզում անել, սուսուփուս մոտենում է և տվյալ օբյեկտին կամ օբյեկտների խմբին հավաքում դիսլօկացիայի վայրից: Եվ ուրեմն ի՞նչ է պատահել, որ ԱԱԾ-ն սկսել է աշխատել դպրոցի ուսմասվարի մեթոդներով՝ թե բա ձեզ խելոք կպահեք, այլապես լավ չի լինի: Էս ուր ենք հասել, այ մարդ: Երեկ դեռ ժողովրդավարության բաստիոն էինք, մեզ ասում էին, որ մենք ենք որոշում, թե ով պետք է լինի իշխանություն, որ մենք կարող ենք ոտքով բացել անգամ ԱԱԾ տնօրենի աշխատասենյակի դուռը: Ու մեկ էլ այսպիսի խայտառակություն:

Գոնե Նիկոլը չլիներ վարչապետ: Մարդ, որ իր գրեթե ողջ գիտակցական կյանքում կոչ է արել բռնի կերպով իշխանություն զավթել, սահմանադրական կարգ տապալել, ոստիկաններից զենք ու զրահ խլել, լոմերով զինվել, այսօր վարչապետ է ու ԱԱԾ-ին հրահանգել է «վախցնել» այդպիսի կոչեր անողներին, հայտարարել, որ տիրապետում է իրավիճակին և այնպիսի զինանոցի (տեխնիկական հնարավորությունների), որ տեղում «կվերացնի» կոչ անողին: Մնացել էր բաց տեքստով ասեին՝ կկրակենք, նռնակ կգցենք, ջրցան կբերենք, БТР, տանկ, պաժառնի ավտո… Կրկնեմ հարցս՝ հարգելի ԱԱԾ, որ այսպիսի հայտարարություն ես տարածում հանրահավաքից 3 ժամ առաջ, գոնե գիտակցո՞ւմ ես, որ դու դառնում ես նախահարձակ կողմ, այսպես ասած՝ ագրեսոր, և ամբողջությամբ կրում հնարավոր անախորժությունների ողջ պատասխանատվությունը: Ձեր տիրոջը՝ Նիկոլին, վաղը ոչ ոք չի մեղադրելու ձեր կատարած գազանությունների համար: Սա հիշեք մեկընդմիշտ: Մեղադրելու են ձեզ և անձամք քեզ, պարն Աբազյան, որովհետև դուք եք արձակելու վերջին հրամանը՝ խփեք, ջարդեք, կոտորեք:

Ես խաղաղության կողմնակից եմ, ինչպես նաև խաղաղ, անցնցում, անարյուն և ստերիլ իշխանափոխության կողմնակից: Եվ որպես այդպիսի իշխանափոխության տարբերակ դիտարկում եմ նաեւ ՀՀ ԱԱԾ-ի և մյուս ուժային կառույցների՝ ժողովրդի կողքին կանգնելու տարբերակը: Նիկոլը, միևնույն է, պետք է հեռանա: Առաջարկում եմ այնպես անել, որ նա հեռանա առանց էքսցեսների՝ մեր ժողովրդի և ուժային կառույցների համագործակցության արդյունքում: Կարծում եմ վատ առաջարկ չէ, մանավանդ որ մեր խառը ժամանակներում չգիտես, թե ով կանի այդ պարզ գործողությունը և որ երկրի դատարան քարշ կտան ՀՀ վարչապետի աթոռին թառած այդ վտանգավոր կրկնահանցագործին:

Պարոն Աբազյան, Դուք, իհարկե, կարող եք իմ այս առաջարկը գնահատել որպես բռնի իշխանափոխության, սահմանադրական կարգի տապալման կոչ: Բայց ոչ, սա երկիրը փրկելու, հող հայրենին պահելու, մեր երեխաներին ապագա թողնելու, մեր ծնողներին հոգեկան անդորր բերելու կոչ է: Այլապես, եկ իրար ջարդենք, կոտորենք, արյուն թափենք… Բայց ո՞ւմ համար, ո՞վ է շահելու դրանից։