Զգուշացե՛ք, «Մուրադը կատաղել ա»․ MediaHub

Արդարադատության նախարար Գրիգոր Մինասյանը երեկ միացավ իր պաշտոնավարման հարցը քննարկելու համար պատգամավորների սկսած ստորագրահավաքին ու ներկայացրեց իր հրաժարականի դիմումը։ MediaHub-ը հիշեցնում է, որ այսօր Նիկոլ Փաշինյանն ընդունեց նրա հրաժարականի դիմումը:

Այս հանգամանքը ՔՊ-ում, մեղմ ասած, ուրախությամբ են ընդունել, հատկապես այն պատգամավորները, որոնք այլևս չէին համակրում ներկաներին հավատարիմ, բայց նախկինի «փոշին» իր վրա կրող Մինասյանին։ Իսկ ինչո՞ւ չէին համարկրում, քանի որ արդարադատության ոլորտում առկա ձախողումներն ամենաակնհայտն են, ու ամենից հաճախն էին ընդդիմադիրները որպես «կոզր» ներկայացնում ԱԺ-ում։

Ինչևէ, Մինասյանին չհամակրողների «թոփ տասում» է նաև ՔՊ-ական պատգամավոր Լուսինե Բադալյանը, որը իննսունականների սերնդին ավելի հայտնի է որպես Լուլու։ Թեև, ինչ խոսք, նա այդպես էլ մնաց Լուլու՝ անկախ պատգամավորի մանդատի առկայությունից: Գեղեցիկ հաղորդավարուհի, որը էկրանից այն կողմ բարի լույս էր մաղթում։ Այսօր այդ գեղեցիկ տիկինը ոչ միայն բարի լույս չի մաղթում, այլ նաև պաշտոնյաների լույսը «դաժան է» դարձնում, քանի որ հիշել է՝ խորհրդարանական Հայաստանում գործադիրի բոլոր ներկայացուցիչները հաշվետու են իրեն։
Եվ ահա, երեկ ՔՊ-ական պատգամավորը, որ այլևս հուզական նոտայի վրա, էմոցիաների տակ գրառումներ չի անում, որոշել է բոլոր նախարարների աշխատանքներին հերթով գնահատական տալ։

Երեկ ԱԺ-ում նա խրոխտ տոնով հայտարարեց՝ մի քանիսից է գոհ, մնացյալից դժգոհ է։ Այնքան հպարտ արտասանեց այդ տողերը, որքան հպարտ Նիկոլ Փաշինյանը 2018-ի էյֆորիայի ֆոնին հայտարարում էր, որ ինքը ՀՀ ընտրված վարչապետն է, կամ էլ Արարատ Միրզոյանը, որ նույնքան խրոխտ պահանջում էր, որ ոչ ոք «չշշկռվի» Նիկոլ Փաշինյանին գերագույն գլխավոր հրամանատար ընդունելու հարցում։ Ինչևէ, այս նույն տոնով երեկ Լուսինե Բադալյանը նկատեց՝ իրենց թիմի իշխանության գալուց անցել է վեց տարի, և արդեն պետք է հստակ արդյունք երևա։ Երբ հարց հնչեց, թե այդ արդյունքը որտե՞ղ չի երևացել, Բադալյանը մեկնաբանեց․ Կառավարություն-ԱԺ հարցուպատասխանի ժամանակ է ամեն ինչ ավելի ակներև դարձել, երբ ընդդիմադիր պատգամավորները սկսել են խոսել երկրում տիրող անօրինությունների և թմրանյութի շրջանառման ծավալների մասին։ 

Հենց դրանից հետո է, պատգամավորի խոսքով, Նիկոլ Փաշինյանը Կառավարության նիստ հրավիրել ու այդ հարցը հստակ բարձրացրել։ Այստեղ, ուղղակի պետք է պատգամավորին հիշեցնել, որ Կառավարության նիստ հրավիրվում է ամեն հինգշաբթի, այսինքն՝ Փաշինյանի հետևողականության մասին չի խոսում այն, որ չորեքշաբթի օրվա հարցուպատասխանից հետո հինգշաբթի օրը Կառավարության նիստ է հրավիրվել։

Ամեն դեպքում, չնայած վերը նշված և նմանատիվ վրիպումներին, Լուսինե Բադալյանն առայժմ եզակիներից է, որ հանրային դաշտում «Մուրադի տոնով» հայտարարում է, որ իրեն հաշվետու լինելու ժամանակն է, այլևս իր դժգոհությունների մասին չի լռելու։ Փաստացի՝ «Մուրադը կատաղել ա», մնում է հասկանալ՝ ո՞ւմ «դաբռոյով», քանի որ «ամենակատաղած» ՔՊ-ականներն էլ իրենց էմոցիաները զսպում են Կառավարության գործընկերների թերությունների մասին խոսելիս։ Վառ օրինակ ԱԺ նախագահ Ալեն Սիմոնյանը, որ երեկ ատամներով պահում էր Կառավարության գործընկերներին, որոնց ոչ պարտաճանաչ լինելու մասին էին ԱԺ ամբիոնից հայտարարում ընդդիմադիր պատգամավորները։