Սրբազանը հասնում է Հանրային հեռուստաընկերություն. ի՞նչ է կատարվում այս պահին

«Տավուշը հանուն հայրենիքի» շարժումը՝ Բագրատ սրբազանի առաջնորդությամբ, հասնում են Հանրային հեռուստաընկերություն։ Ավելի վաղ Հանրապետության հրապարակում հրավիրած հանրահավաքի ժամանակ Բագրատ սրբազանը հայտարարեց, որ երթով շարժվում են Հանրային հեռուստաընկերություն` պահանջելու ուղիղ եթեր։ 

«Սա լինելու է մեր առաջին պահանջը, իսկ հետո կհասկանանք` ինչ գործողություններ ենք կատարելու»,– Հանրապետության հրապարակում հայտարարեց Սրբազանը։ 

Ավելի ուշ, Հանրային հեռուստաընկերությունը հայտարարություն տարածեց, թե պատրաստ է ուղիղ եթերում` հարցազրույցի ձևաչափով, հյուրընկալել Բագրատ Գալստանյանին կամ շարժման առաջնորդներից որևէ մեկին:  

«Շարժման մեկնարկից ի վեր Հանրային հեռուստաընկերությունը բազմիցս հրավեր է ուղարկել շարժման առաջնորդներին և հիմնականում ստացել մերժում։ Նրանք, ովքեր չեն հրաժարվել հարցազրույցից, հյուրընկալվել են մեր եթերում»,– ասվում է հայտարարության մեջ։

 Սրան զուգահեռ, Հանրային հեռուստաընկերության ճանապարհին, Բագրատ սրբազանն արձագանքեց այս հայտարարությանը` նշելով, որ հարցազրույցի ժամանակը վաղուց անցել է, և իրենք ոչ թե հարցազրույց են ուզում ուղիղ եթերում, այլ ուղերձ։

Նշենք նաև, որ համացանցում պարբերաբար տեսանյութեր են տարածվում Հանրային հեռուստաընկերության շենքի մոտից, որտեղ րոպե առ րոպե ավելանում են ոստիկանության ուժերը։ 

Հիշեցնենք նաև, որ սեպտեմբերի 22–ին Կարեն Դեմիրճյանի անվան մարզահամերգային համալիրում հավաքի ժամանակ, Սրբազանը հայտարարել էր, որ շարժման պայքարի ակտիվ շրջանը կվերսկսվի և որպես առաջին քայլ` կլինի հանրահավաք։

Սիլվի Մուրադյան