Դադարեցվել է 11 մարզիկի շարքային կազմի պարտադիր զինվորական ծառայության զորակոչից տրված տարկետումը․ ովքեր են նրանք

Կառավարությունը նիստի ընթացքում ընդունեց որոշում, որով առաջարկվում է դադարեցնել 18.07.2024թ. սպորտի բնագավառում նշանակալի նվաճումներ ունենալու համար տարկետում ստացած 11 քաղաքացիների տարկետումներ՝ հաշվի առնելով ՀՀ ըմբշամարտի և բռնցքամարտի ֆեդերացիաների կողմից 22.07.2024թ. և 05.08.2024թ. ներկայացված գրություններն առ այն, որ վերջիններս այլևս չեն հանդիսանում հավաքականների անդամներ:

Ըստ էության, ստացվում է, որ տարկետում ստանալուց հետո համապատասխան քաղաքացիներն ընդամենը մի քանի օր անց դադարել են հավաքականների անդամ հանդիսանալ։

Նախագծում նշվում է, որ այս հանգամանքը լրացուցիչ պարզաբանման կարիք ունի․ ե՞րբ են նշված քաղաքացիները դարձել հավաքականի անդամ, ե՞րբ են դուրս եկել հավաքականի կազմից, ի՞նչ պատճառներով, ի՞նչպես նաև այն, թե ինչո՞ւ է համապատասխան քաղաքացիների տարկետման դադարեցման հարցը դիտարկվում շարքային կազմի պարտադիր զինվորական ծառայության 2024 թվականի ամառային զորակոչից հետո։

11 մարզիկներն են՝ Դավիթ Կարենի Սիմոնյանը, Ոսկան Վարուժանի Ոսկանյանը, Միսակ Գևորգի Տեփանյանը, Արմեն Թորոսի Պողոսյանը, Արման Հայկի Վարդանյանը, Արման Վարազդատի Ավագյանը, Հենրիկ Լյովայի Հայկյանը, Սարգիս Արթուրի Բեգոյանը, Արման Սամվելի Հարությունյանը, Հրայր Հրաչի Ալիխանյանը, Սամվել Կարենի Գևորգյանը։