Հոլոքոստն այնքան հիմնավորված չէր, որքան Հայոց եղեռնը, սակայն հրեական համայնքն ազդեցիկ է. Ջոն Բալյան

«The Times of India» պարբերականն անդրադարձել է Հայոց ցեղասպանության թեմային և դրա շուրջ հարցազրույց ունեցել «Մոխրագույն գայլերն ու ճերմակ աղավնիները» գրքի հայ հեղինակ Ջոն Բալյանի հետ:

Այդ սարսափազդու աղետի վերքերն այդպես էլ չեն ապաքինվել, աղետ, որը տեղի ունեցավ Համաշխարհային առաջին պատերազմի և նրան հաջորդած տարիներին և խլեց 1.5 մլն հայի կյանք: Տասնամյակներ անց դրա հետևանքները դեռ իրենց ազդեցությունն են թողնում տարածաշրջանի վրա: Չնայած միջազգային հանրությանն ուղղված բազմաթիվ խնդրանքներին՝ ճանաչել Հայոց ցեղասպանությունը, աշխարհի շատ պետություններ շարունակում են աչք փակել դրա վրա. գրում է պարբերականը:

«Հոլոքոստն այնքան լավ չէր փաստերով հիմնավորված, որքան Հայոց ցեղասպանությունը, սակայն հրեական համայնքը շատ ազդեցիկ է աշխարհում»,-նշել է գրքի հեղինակը:

Բալյանը ծնվել է Արևմտյան Հայաստանում՝ Դիարբեքիրից ոչ հեռու գտնվող աղքատիկ գյուղակում, և մեծացել թշվառության մեջ: Օտարերկրացիների ցուցաբերած օգնության շնորհիվ հայտնվել է Ամերիկայում: Նա որոշել է մարմնավորել իր ապրումները գեղարվեստական գրքի միջոցով:

«Ես շատ կցանկանայի, որ իմ գիրքը նույնպես ֆիլմի տեսքով էկրան բարձրանար: Ես ուրախ եմ, որ ռեժիսոր Շեքհար Կապուրը որոշել է հետաքրքրություն ցուցաբերել Հայոց ցեղասպանության նկատմամբ և ֆիլմ նկարահանել, թեկուզև տարիներ առաջ լույս տեսած մեկ այլ հեղինակի գրքի հիման վրա»,-ասել է Բալյանը: