Իսրայելը հետաձգել Է Իրանի վրա հարձակումը իր պլանների արտահոսքից հետո

Իսրայելի կողմից Իրանին պատասխան հարված հասցնելու պլանների արտահոսքը ստիպեց Իսրայելի իշխանություններին հետաձգել գործողությունը: Այս մասին, Euromedia24.com-ի հաղորդմամբ, հայտնում է բրիտանական The Times թերթը՝ հղում անելով աղբյուրներին։

«ԱՄՆ փաստաթղթերի արտահոսքը հետաձգել է հարձակումը ռազմավարության որոշ տարրերի և բաղադրիչների փոփոխության անհրաժեշտության պատճառով», - ասում է հետախուզական համայնքի աղբյուրը:

«Կլինի պատասխան, բայց դա սպասվածից ավելի երկար կպահանջի»:

 

Ավելի վաղ հայտնի էր դարձել, որ ԱՄՆ-ը հետաքննություն է անցկացնում խիստ գաղտնի փաստաթղթերի արտահոսքի առնչությամբ, որոնք պարունակում են հետախուզական տեղեկատվություն Իրանի դեմ հակահարված տալու Իսրայելի ծրագրերի մասին։

 

Հոկտեմբերի 15-ով և 16-ով թվագրված «հույժ գաղտնի» փաստաթղթերը սկսեցին շրջանառվել համացանցում Մերձավոր Արևելքի Spectator Telegram ալիքում հրապարակվելուց հետո:

Դատելով փաստաթղթերում տեղ գտած տեղեկություններից՝ ենթադրվում էր, որ դրանց հասանելիություն ունեին միայն «Հինգ աչքեր» դաշինքի անդամ երկրները, որոնց թվում են Ավստրալիան, Մեծ Բրիտանիան, Կանադան, Նոր Զելանդիան և ԱՄՆ-ը։

Հոկտեմբերի 1-ի երեկոյան Իրանը լայնածավալ հրթիռային հարձակում գործեց Իսրայելի վրա՝ ի պատասխան պաղեստինյան ՀԱՄԱՍ շարժման, լիբանանյան շիական Հեզբոլլահի և Իրանի Իսլամական հեղափոխության պահապանների կորպուսի ղեկավարության առանցքային դեմքերի սպանություններին։

Իր հերթին Իրանի գերագույն առաջնորդ այաթոլլա Ալի Խամենեին զգուշացրել է, որ Իսրայելի դեմ իր երկրի պատասխան հարվածներն այս դեպքում ավելի լայնածավալ կլինեն:

 

The Times-ի փոխանցմամբ՝ ԱՄՆ պետքարտուղար Անտոնի Բլինկենը Իսրայելի վարչապետ Բենիամին Նեթանյահուի հետ վերջերս կայացած հանդիպմանը կոչ է արել հրեական պետության իշխանություններին զսպվածություն ցուցաբերել Իրանի դեմ հակահարված տալու հարցում։