The Guardian. Օլանդին մեղադրում են դատարանի վրա ճնշում գործադրելու մեջ

Ֆրանսիայի նախագահ Ֆրանսուա Օլանդը նամակ է գրել դատարանին՝ ի աջակցություն իր քաղաքացիական կնոջ՝ լրագրող Վալերի Տրիերվեյլերի, ինչն Օլանդի հակառակորդները գնահատում են որպես ճնշում դատարանի վրա. այս մասին գրում է The Guardian-ը: RTL ռադիոյով հրապարակված՝ դատավորներին ուղղված նամակում Օլանդը հերքել է ինֆորմացիան Տրիերվեյլերի La Frondeuse կենսագրականից, որի հեղինակների դեմ լրագրողուհին հայց է ներկայացրել դատարան: Մասնավորապես՝ Օլանդը հորինված է անվանել իբր 1990-ականներին գրված նամակը, որի մասին նշվում է գրքում:

Օլանդից բացի, Տրիերվեյլերին աջակցող նամակ գրել է նաև ներքին գործերի նախարար Մանուել Վալսը. գրում է L'Express-ը:
Գրքի հեղինակների փաստաբանները համարում են, որ Օլանդի նամակն իշխանության բաժանման քաղաքականության կոպիտ խախտում է և ուղղված է դատարանի վրա ճնշում գործադրելուն: Տրիերվեյլերի շահերի պաշտպանները, հակառակը, ընդգծել են, որ Օլանդը գործել է որպես անհատ, ով ցանկանում է աջակցել իր կնոջը:

Նշենք, որ Տրիերվեյլերը դատարանում պահանջում է փոխհատուցում 80 հազար եվրոյի չափով զրպարտության և անձնական կյանք ներխուժման համար՝ 5 հազար եվրո՝ գրքի հեղինակից, 70 հազար եվրո՝ Point de Vue ամսագրից, որտեղ և հրապարակվել է հարցազրույցը գրքի հեղինակների հետ: Կենսագրականում մասնավորապես նշվում է, որ մոտ տաս տարի առաջ լրագրողուհին արդեն հարաբերություններ ուներ Օլանդի հետ, թեև այդ ընթացքում Ֆրանսիայի ներկայիս նախագահը ապրում էր Սեգոլեն Ռուայալի հետ, որի հետ ունի համատեղ 4 երեխա: