Ես բավականին բարձր թոշակ եմ ստանում և ոչ մի կոռուպցիայի մեջ երբեք չեմ եղել․ Սասուն Խաչատրյան

Սասուն Խաչատրյանի՝ Հակակոռուպցիոն կոմիտեի նախագահի պաշտոնից ազատվելուց հետո նրան փոխարինող դեռ չեն գտել, մրցույթ պետք է լինի, որը դեռ չի կայացել, իսկ ինքը՝ Սասուն Խաչատրյանն էլ դեռ հանգստանում է, որևէ աշխատանքի դեռ չի անցել։

«Ոչ մի բանով չեմ զբաղվում, դեռ հանգստանում եմ, Վահե ջան»,- MediaHub-ի հետ զրույցում ասել է Խաչատրյանը՝ նշելով, որ ապրում է թոշակով։

«Ես բավականին բարձր թոշակ եմ ստանում, իրավապահ մարմիններում 23 տարվա ստաժ ունեմ աշխատանքի, էնպես որ, անցել եմ թոշակի»,– ասել է նա։

Հարցին, թե  շարունակելո՞ւ է այդ թոշակով «յոլա գնալ», Խաչատրյանը պատասխանել է․ «Դե, ոչ ոք չգիտի՝ վաղը իր հետ ինչ է լինելու, կամ վաղը ինքը ինչ միտք կունենա, ինչով կզբաղվի»։

Անդրադառնալով հարցին, թե արդյոք իր հետ կապված որևէ գործընթաց կա՞, քաղաքական կամ քրեական, Հակակոռուպցիոն կոմիտեի նախկին նախագահը նշել է․ «Ես մի բան հաստատ կարող եմ ասել, որ ոչ մի կոռուպցիայի մեջ երբեք չեմ եղել։ Շնորհակալ եմ, այսքանը»։

Հիշեցնենք, որ Euromedia24-ի տեղեկություններով՝ իր նոր նշանակմանն է պատրաստվում Սասուն Խաչատրյանը, ով Փաշինյանի հեռախոսից ստացած վոթսափ SMS-ի նամակ-հարկադրանքով ստիպված եղավ տարեվերջին լքել Հակակոռուպցիոն կոմիտեի նախագահի պաշտոնը։

Սասուն Խաչատրյանն հավակնում է ԱՄՆ-ում Հայաստանի լիազոր դեսպանի պաշտոնին նշանակվել, բայց այս հաստիքն արդեն 3 տարուց ավելի է՝ զբաղեցնում է Փաշինյանի անգլերենի ուսուցչուհի Լիլիթ Մակունցը։