Հայաստանի իշխանությունների առջև նույն Թուրքիան պայման է դրել ոչնչացնել հայկական էթնո-ազգային ինքնությունը. Արման Աբովյան

Արման Աբովյանն իր ֆեյսբուքյան էջում գրել է.

«Մանրանում են թավշյա քարոզչության հնարքները, ավելի ու ավելի են «պուճուրանում»։ Օրինակ, իսկ դուք գիտեիք, որ Հայաստանին զենք վաճառելու դիմաց պայման է դրված, որ եթե հայերը հիշում և պատվում են Արարատ լեռը՝ որպես հայկական ինքնության խորհրդանիշ, ապա այդ պարագայում մեզ իբր զենք չեն վաճառի, կամ կվաճառեն «հին» զենք։ Սա անեկդոտ չէ, սա կատակ չէ, սա նույնիսկ զառանցանք չէ, սա պետության դիրքորոշումն է։ Այդ դեպքում ստացվում է, որ, օրինակ, հիպոթետիկ Հնդկաստանի, Ռուսաստանի, ԱՄՆ-ի, Իրանի կամ Ֆրանսիայի կողմից հայերին զենք վաճառելու պայմանը պետք է լինի հայերի հրաժարումն իրենց քրիստոնեական արմատներից և ազգային ինքնությունից։ Միանշանակ սա աբսուրդի հասնող, անհավանական անթաքույց և բացարձակ սուտ է։ Ես պնդում եմ, որ երբեք, ոչ ոք և ոչ մի տեղ Հայաստանի պահանջ չի ներկայացրել Արարատ լեռան վերաբերյալ, բացի թուրքերից և ադրբեջանցիներից։ Այդ դեպքում ստացվում է, որ փաշիստները նախատեսում են զենք գնել Ադրբեջանից և Թուրքիայից` թուրք-ադրբեջանական տանդեմից պաշտպանվելու համա՞ր: Ես չեմ խելագարվել, ես ուղղակի տրամաբանական շղթա եմ անցկացնում՝ ելնելով պետության ղեկավարի հայտարարություններից։ Սա ինչ-որ շատ «խուճուճ» սյուրռեալիզմ է, որը լիովին սուտ է` ինչպես ըստ էության, այնպես էլ իր բուն բովանդակությամբ: Բայց հարցն այն է, թե ինչու է դա արվում: Չե որ այս աբսուրդի հեղինակները կամ հենց ինքը` Փաշինյանը շատ լավ հասկանում են, որ ուղղակի զավեշտալի սուտ են տարածում։ Բայց այնուամենայնիվ` ինչու հանրային դիսկուրսի մեջ գցվեց այս միանգամայն սուտ աննորմալությունը։ Ամեն ինչ պարզից պարզ է: Անվտանգության հարցը հայ հասարակության շրջանում ամենահրատապն ու պահանջվածն է, և ըստ այդմ՝ փաշինյանական իշխանությունները որոշել են խաղալ հասարակության վախերի վրա, իբր` եթե չհրաժարվենք Արարատից (այսինքն՝ մեր ինքնությունից), ապա անպաշտպան կմնանք, քանի որ մեզ զենք չեն վաճառի։ Իսկ գուցե ամեն ինչ շատ ավելի պա՞րզ է, և Հայաստանի իշխանությունների առջև նույն Թուրքիան պայման է դրել ոչնչացնել հայկական էթնո-ազգային ինքնությունը, իսկ Հայաստանի իշխանությունները թուրքական կամքն իրականացնելու համար արդեն ուղղակի չգիտեն ինչպես բռնաբարել «հպարտ քաղաքացիների» գիտակցությունը և որոշել են պարզապես նորից վախեցնել մարդկանց։ Ի վերջո, եթե դուք չունեք այն, ինչ պետք է պաշտպանել (օրինակ, ազգային ինքնությունը), ապա զենք գնելու իմաստ այլևս չի լինի քանզի ազգը կվերածվի հարկ վճարողների անխոս հոտի, որն անպայման կկործանվի, քանզի պայքարելու իմաստ պարզապես չի ունենա»։