Զելենսկին հայտնել է ուկրաինական ԶՈւ-ի կորուստները

Ուկրաինայի Զինված ուժերը Ռուսաստանի դեմ մարտերի ընթացքում կորցրել են 45 100 զինծառայողի, այս մասին հայտնել է Ուկրաինայի նախագահ Վոլոդիմիր Զելենսկին բրիտանացի լրագրող Փիրս Մորգանին տված հարցազրույցում, փոխանցում է Euromedia24-ը։

«Մեր կորուստների վերաբերյալ. մեզ համար շատ կարևոր են ստույգ թվերը՝ 45 100 մարդ զոհ և մոտ 390 000 վիրավոր», - ասել է Զելենսկին։

2024 թվականի փետրվարին Զելենսկին հայտարարել էր, որ ռազմաճակատում զոհվել է 31 000 զինվորական։ Սակայն դեկտեմբերի 8-ին Զելենսկին, մեկնաբանելով ԱՄՆ նախագահ Դոնալդ Թրամփի խոսքերն Ուկրաինայի Զինված ուժերի շարքերում 400 000 կորուստների մասին, հայտարարել էր, որ Ռուսաստանի ծավալած պատերազմի սկզբից ի վեր Ուկրաինան մարտի դաշտում կորցրել է 43 000 զինվոր, օգնություն է ցուցաբերվել 370 000 վիրավորի: