Ճապոնիան մտադիր է հաշտության պայմանագիր կնքել Ռուսաստանի հետ

Ճապոնիան ցավալի փաստ է համարում Ռուսաստանի հետ խաղաղության պայմանագրի բացակայությունը։ Այս մասին Ճապոնիայի կառավարության ղեկավար Շիգերու Իշիբան հայտարարել է հյուսիսային տարածքների վերադարձի համար համազգային հանրահավաքի մասնակիցներին, փոխանցում է ՏԱՍՍ-ը։

«Ցավալի է, որ նույնիսկ հիմա՝ պատերազմի ավարտից 80 տարի անց, Հյուսիսային տարածքների հարցը չի լուծվել, և Ճապոնիայի ու Ռուսաստանի միջև խաղաղության պայմանագիր չի կնքվել»,- ասել է նա։

Իշիբան հավելել է, որ Ճապոնիայի կառավարությունը հանձնառու է լուծել չորս հյուսիսային կղզիների սեփականության հարցը և խաղաղ պայմանագիր կնքել։

Այնուամենայնիվ, նրա խոսքով, Ուկրաինայում հատուկ ռազմական գործողության պատճառով՝ «Ճապոնիայի և Ռուսաստանի հարաբերություններում իրավիճակը շարունակում է մնալ բարդ»:

Այսօր Տոկիոյում տեղի է ունենում, այսպես կոչված, համազգային հանրահավաք՝ հանուն Հյուսիսային տարածքների վերադարձի։ Ճապոնիայի կառավարության որոշմամբ՝ նման հանրահավաքներ անցկացվում են ամեն տարի փետրվարի 7-ին՝ ի հիշատակ 1855 թվականի այս օրը ստորագրված ռուս-ճապոնական առաջին պայմանագրի։ Դրանց ավանդաբար մասնակցում են նախարարներ, իշխող ու ընդդիմադիր կուսակցությունների պատգամավորներ, Կուրիլյան կղզիների հարավային հատվածի նախկին բնակիչներ։