Թրամփը հեռախոսազրույց է ունեցել Վլադիմիր Պուտինի հետ

ԱՄՆ նախագահ Դոնալդ Թրամփը հայտարարել է, որ հեռախոսազրույց է ունեցել Ռուսաստանի առաջնորդ Վլադիմիր Պուտինի հետ: Կողմերը քննարկել են Ուկրաինայում ստեղծված իրավիճակը և դրա կարգավորման հնարավոր ուղիները։ Այս մասին Թրամփը խոսել է New York Post-ին տված հարցազրույցում, փոխանցում է Gazeta.ru-ն։

Թրամփը գերադասել է չհրապարակել զրույցի մանրամասներն ու տեւողությունը՝ նշելով միայն, որ Վլադիմիր Պուտինը մտահոգված է հակամարտության գոտում զինվորների մահով և ձգտում է դադարեցնել ռազմական գործողությունները։

Սպիտակ տան ղեկավարը եւս մեկ անգամ ընդգծել է, որ «կոնկրետ ծրագիր» ունի Ուկրաինայում հակամարտությունը դադարեցնելու համար, սակայն մանրամասներ չի հայտնել։

Հիշեցնենք, որ հունվարին Թրամփը հայտարարել էր, որ ցանկանում է հանդիպել Պուտինի հետ «մոտ ապագայում»։ Ավելի վաղ նա չէր բացառել նաեւ Ուկրաինային ամերիկյան զենքի մատակարարումը դադարեցնելու հնարավորությունը եւ հայտարարել էր ՌԴ ղեկավարի հետ հանդիպելու պատրաստակամության մասին։