Չինաստանի նախագահը կայցելի Մոսկվա՝ մասնակցելու Հաղթանակի օրվա տոնակատարություններին

Չինաստանի նախագահ Սի Ծինփինը համաձայնել է մեկնել Մոսկվա՝ մասնակցելու Հայրենական մեծ պատերազմում հաղթանակի 80-ամյակի տոնակատարությանը։ Այս մասին «Ռոսիա-24»-ի եթերում ասել է Չինաստանում Ռուսաստանի դեսպան Իգոր Մորգուլովը։ Նա չի հայտնել, թե որ միջոցառումներին է մասնակցելու քաղաքական գործիչը։

«Չինաստանի Ժողովրդական Հանրապետության նախագահ Սի Ծինփինը ընդունել է մայիսի 9-ին Մոսկվայում Հայրենական մեծ պատերազմում տարած հաղթանակի 80-ամյակի տոնակատարություններին մասնակցելու հրավերը»,- ասել է Մորգուլովը։

Նա նշել է, որ Սի Ծինփինը Ռուսաստանի նախագահ Վլադիմիր Պուտինին հրավիրել է սեպտեմբերի սկզբին այցելել Չինաստան, որտեղ նույնպես տեղի կունենան տոնական միջոցառումներ։ Աշնան առաջին ամսին երկիրը նշում է Հաղթանակի օրը Ճապոնական ագրեսիայի դեմ Չինաստանի Ժողովրդական դիմադրության պատերազմում։ Սա համարվում է Երկրորդ համաշխարհային պատերազմի մաս։