Արևմուտքը փորձում է ճնշում գործադրել Աբխազիայի և Հարավային Օսիայի վրա. Գալուզին

Միացյալ Նահանգները և Եվրամիությունը փորձում են ճնշում գործադրել Աբխազիայի և Հարավային Օսիայի վրա։ Այս մասին ՌԻԱ Նովոստիին տված հարցազրույցում ասել է ՌԴ փոխարտգործնախարար Միխայիլ Գալուզինը։

«Վաշինգտոնը և Բրյուսելը փորձում են ճնշում գործադրել նույնիսկ մեր ամենամոտ դաշնակիցների՝ Աբխազիայի և Հարավային Օսիայի վրա»,- ասել է նա։

Դիվանագետի խոսքով, Ռուսաստանը սկզբունքորեն այլ տրամաբանություն և նպատակներ ունի տարածաշրջանում։

Փետրվարի 6-ին հայտնի դարձավ, որ Ռուսաստանի ֆինանսների նախարարությունը միջոցներ է ուղարկել Աբխազիա՝ հանրապետության սոցիալ-տնտեսական զարգացման նպատակով։

Բացի այդ, Ռուսաստանը, աբխազ քաղաքական գործիչ Բադրա Գյունբայի նախաձեռնությամբ, կստեղծի հատուկ հիմնադրամ Աբխազիայում փոքր ու միջին բիզնեսին աջակցելու համար։ Ռուսաստանի Դաշնության փոխվարչապետ Ալեքսանդր Նովակը նշել է, որ այդ նպատակների համար արդեն հատկացվել է 100 մլն ռուբլի։ Հիմնադրամը նաև աշխատանքով կապահովի հանրապետության բնակչությանը։ Գյունբան հայտարարել է, որ Աբխազիան զգում է Ռուսաստանի աջակցությունը ձեռներեցության զարգացման հարցերում։

Անցյալ տարվա նոյեմբերին Աբխազիայում բողոքի ցույցեր տեղի ունեցան, ինչը հանգեցրեց նախագահ Ասլան Բժանիայի հրաժարականին։ Պատճառը խորհրդարանի՝ Ռուսաստանի Դաշնության հետ ներդրումային համաձայնագրի վավերացման հարցը քննարկելու պլաններն էին։ Ընդդիմությունը կարծում էր, որ այս համաձայնագիրը չի համապատասխանում տեղի բնակիչների շահերին։