Գորբաչովը ստորագրել է Յավլինսկու նախագահի թեկնածու առաջադրվելու օգտին

ԽՍՀՄ նախկին ղեկավար Միխայիլ Գորբաչովը ստորագրել է Գրիգորի Յավլինսկու Ռուսաստանի նախագահի թեկնածու առաջադրվելու օգտին։ Այս մասին հաղորդում են ռուսական լրատվամիջոցները՝ վկայակոչելով Յավլինսկու ղեկավարած «Яблоко» կուսակցության պաշտոնական կայքում տեղադրված հայտարարությունը։

Հունվարի 13-ին Յավլինսկու նախընտրական շտաբը հայտարարել էր, որ նախագահի թեկնածու առաջադրվելու համար պահանջվող քաղաքացիների 2 մլն ստորագրությունից հավաքվել է 1,7 մլն ստորագրություն։ Կուսակցության ղեկավարությունը հայտարարել է, որ մնացյալ ստորագրությունները կհավաքվեն մոտակա օրերին։ 

Այս պահին Մոսկվայում անցկացվում է «Яблоко» կուսակցության հանրահավաքը։

Կուսակցության ղեկավար Սերգեյ Միտրոխինը հայտարարել է, որ պետք է հատուկ ուշադրություն դարձնել ընտրությունների թափանցիկ անցկացմանը և այդ գործընթացին աջակցելու համար դիմել է ցույցի մասնակիցներին։