Facebook-ը վճարովի է դարձնում հաղորդագրություններ ուղարկելը

Facebook խոշորագույն սոցիալական ցանցը որոշել է ժամանակավորապես հաղորդագրություններ ուղարկելը դարձնել վճարովի: Ընկերների ցուցակում չգտնվող անձանց մեկ հաղորդագրություն ուղարկելու արժեքն է մեկ դոլար: Այս կերպ սոցցանցը նոր միջոցներ է փնտրում իր հանրահայտության շնորհիվ գումար աշխատելու համար. գրում է The Wall Street Journal-ը:

Ընկերության արված հայտարարության մեջ նշվում է. «Հաղորդագրություն ուղարկողի համար ֆինանսական ծախսերի ներմուծումը կարող է դառնալ ամենաարդյունավետ միջոցն անցանկալի հաղորդագրությունները խոչընդոտելու և անհրաժեշտ ու օգտակար հաղորդագրությունները տեղ հասցնելու ճանապարհը հեշտացնելու համար»:

Facebook-ն արդեն թույլատրում է ընկերների ցուցակում չգտնվող անձանց հաղորդագրություն ուղարկել, որոնք, սակայն, մեզ հասնում են «Այլ» անունը կրող թղթապանակով: Նոր համակարգը թույլ կտա ընկեր չհանդիսացող մարդու ուղարկած հաղոդագրությունը ստանալ այն թղթապանակում, որտեղ որ պահվում են ընկերներից ստացվող հաղոդագրություները: Դրա դիմաց կգանձվի մեկ դոլար:

Այս գործառույթը հասանելի է միայն անհատական օգտատերերի համար: Բրենդային ապրանքանիշների էջերը Facebook-ում չեն կարող օգտվել այդ ծառայությունից: