Սաուդյան Արաբիայում Սուրբ ծնունդը նշել փորձող քրիստոնյաները հայտնվել են բանտում. Der Standard

Սաուդյան Արաբիայի ոստիկանությունը կանխել է Սուրբ ծննդյան տոնի առթիվ երեկույթի անցկացումը: Ինչպես հաղորդում է ավստրիական պարբերականը, անվտանգության ուժերը ներխուժել են այն տունը, ուր պետք է նշվեր Սուրբ ծնունդը, և ձերբակալել 41 հյուրերին: Հյուրընկալ տանտերն ասիացի դիվանագետ է եղել:

Այս տարվա Սուրբ ծննդյան երեկոն հյուրերի և տանտիրոջ համար ավարտվել է ճաղերի հետևում: Ոստիկանները չորեքշաբթի գիշերը գրոհով հարձակվել էին Ալ Ջուֆ նահանգում գտնվող այդ տան վրա և ձերբակալել բոլոր ներկա քրիստոնյաներին, քանի որ նրանք, ըստ ոստիկանության ունեցած տվյալների, պատրաստվում էին Սուրբ ծննդյան երեկոն նշել:

Լրատվամիջոցները հայտնել էին, որ ասիացի դիվանագետի հյուրերի ցուցակում, բացի 41 քրիստոնյաներից, եղել են նաև մուսուլմաններ Սաուդյան Արաբիայից և Եգիպտոսից: Ոստիկանությունը հայտարարել է, որ տանտերն ու երկու մուսուլմաններ սարսափելի հարբած վիճակում են եղել, ինչը մեծ մեղք է համարվում պահպանողական այդ երկրում: Դեռևս հայտնի չէ՝ ազատ արձակել են ձերբակալվածներին, թե՝ ոչ:

Սաուդյան Արաբիան, որը մուսուլմանաբնակ երկիր է, պաշտոնապես արգելում է քրիստոնեական երևույթների ցանկացած դրսևորում: Նույնիսկ Աստվածաշունչ կամ խաչ ունենալը Սաուդյան Արաբիայում օրենքով արգելված է, չնայած որ երկրում քիչ չեն քրիստոնյա գասթարբայթերները Ֆիլիպիններից և Հնդկաստանից: Իսլամական սրբավայրեր Մեքքա և Մեդինա քաղաքների հայրենիք հանդիսացող այս երկրում քրիստոնեական հոգևոր արարողություններն արգելված են: Քրիստոնյա հոգևորականները չեն կարող մուտք գործել այս երկիր: Իսլամական հավատը վիրավորելու համար այնտեղ մահապատիժ է սպառնում:

Սուրբ ծնունդը հրապարակայնորեն կամ հասարակական վայրերում նշելը բնականաբար Սաուդյան Արաբիայում վաղուց և միշտ արգելված է եղել: Այստեղ նորարարությունն այն է, որ պետության կողմից վերահսկվում են քրիստոնյաների կողմից տոնը նշելու մասնավոր փակ միջոցառման փորձերը: