Հայաստանը 38-րդն է ամենաազատ տնտեսություն ունեցող երկրների ցանկում

Հայաստանը տնտեսության ազատության ցուցանիշով գտնվում է Heritage հիմնադրամի կազմած աղյուսակի 38-րդ տեղում 69.4 միավորով և գնահատվել է որպես չափավոր ազատ: Այս մասին նշում է The Wall Street Journal ամսագիրը: 

Հայաստանի ցուցանիշն անցած տարվա համեմատ 0.6 միավորով աճել է, ինչը մեծ մասամբ պետական ծախսերի ճիշտ կառավարման արդյունք է: Հայաստանը 17-րդն է եվրոպական տարածաշրջանի 43 երկրների շարքում:

Տնտեսական բազմազանությունը տնտեսական աճի առիթ է դարձել, ինչի արդյունքում էլ երկրում կրճատվել է աղքատության և գործազրկության չափանիշները: Արդյունավետության համար շատ կարևոր է եղել նաև բիզնես ընթացակարգերի պարզեցումը: 

Չնայած որ Հայաստանը համեմատաբար աճ է արձանագրել տնտեսական ասպարեզում, սակայն դեռևս մեծ բարեփոխումներ են հարկավոր դատական և կառավարական համակարգերում: Հակառակ կոռուպցիայի դեմ պայքարի ասպարեզում արձանագրված առաջընթացին՝ մասնավորապես հարկային և մաքսային քաղաքականության մեջ, դեռևս պահպանվում են բարեկամական հարաբերությունները քաղաքականության և բիզնեսի շրջանակներում:

Հայաստանի համախառն ներքին արդյունքը կազմել է 17.9 մլրդ դոլար` արձանագրելով 4.4 % աճ: Գործազրկությունը կազմել է 5.9 %, սղաճը՝ 7.7 %, օտար ուղղակի ներդրումները՝ 524.6 մլն դոլար: 

Առաջին տեղում գտնվում է Հոնգկոնգը՝ 89.3 միավոր: Այնուհետև Սինգապուրն է 88.0 միավորով և Ավստրալիան՝ 82.6 միավորով: Ադրբեջանը գտնվում է 88-րդ տեղում, որի տնտեսությունը գնահատվել է որպես մեծ մասամբ անազատ, իսկ Վրաստանը 21-րդ տեղում է և ունի մեծ մասամբ ազատ տնտեսություն: