Էրդողանը Փարիզում սպանված քուրդ ակտիվիստուհիների մահվան մեջ մեղադրում է PKK-ի ներքին ընդդիմությանը. Der Standard

Փարիզում սպանված 3 քուրդ ակտիվիստուհիների մահվան մեջ Թուրքիան և «Քուրդիստանի աշխատավորական կուսակցությունը» (PKK) միտում են տեսնում՝ խափանելու խաղաղության բանակցային գործընթացը երկու կողմերի միջև:

Դա է հաստատել նաև ուրբաթ օրը Թուրքիայի վարչապետ Ռեջեփ Թայիփ Էրդողանն իր հայտարարության մեջ: «Իրադարձությոնների ընթացքը ցույց է տալիս, որ մարդասպանությունը կատարվել է զոհերի կողմից ճանաչված անձանց կողմից: Դա է վկայում նաև այն հանգամանքը, որ անվտանգության նկատառումներով փակ պահվող դուռը բաց է եղել, և դրա վրա գործադրված ուժի վրա հետքեր չկան: Կասկած չկա, որ դուռը կարող էր բացված լիներ միայն այն մարդկանց համար, ովքեր ճանաչում էին ակտիվիստուհիներին: Մարդասպանությունը դիտավորություն ունի սաբոտաժի ենթարկել PKK-ի հետ ձեռնարկված խաղաղ բանակցային գործընթացը»,-մեջբերում է ավստրիական պարբերականը:

Հիշեցնենք, որ նախօրեին Փարիզում գնդակահարվել էր 3 քուրդ կին, ովքեր կապված էին քրդական ազգայնական կազմակերպությունների հետ: Նրանց մարմինները հայտնաբերվել էին Փարիզում Քուրդիստանի ինստիտուտի շենքի մոտ: Ինչպես գրում է ActuKurde կայքը, սպանվածներից մեկը՝ Սաքինե Քանսըզը, եղել է «Քուրդիստանի աշխատավորական կուսակցության» համահիմնադիրներից մեկը:

Մյուս կինը՝ Ֆիդան Դողանը, Բրյուսելում գտնվող Քուրդիստանի ազգային կոնգրեսի ներկայցուցիչն է եղել: Սպանված երրորդ կնոջ անունն է Լեյլա Սոյլեմեզ: