«Տրոյկա Դիալոգ» ընկերությունն ու «Սբերբանկ»–ը միավորվեցին

«Տրոյկա Դիալոգ» ներդրումային ընկերությունը և «Սբերբանկ»–ն ավարտել են միավորման գործընթացը։  

«Տրոյկա Դիալոգ»–ի միավորումը «Սբերբանկ»–ի հետ վերջինիս թույլ է տալիս նոր որակի ծառայություններ մատուցել. հաճախորդներին բարձր մակարդակի ֆինանսական խորհրդատվություն և ներդրումային ռազմավարությունների բարձր մակարդակի մշակում, որոնք կնպաստեն ընդլայնել ժամանակակից ֆինանսական գործարքների շրջանակը՝ ավանդական բանկային գործարքներից անցնելով բարդացված ներդրումային բանկային գործարքների և համաշխարհային շուկայական գործարքների։ 

Երկու ընկերությունների միավորումն, ինչպես նշում է «Ռիա Նովոստի»–ն, նոր հնարավորություններ է ստեղծում բիզնես դաշտի համար` դառնալով կորպորատիվ–ներդրումային բանկ (CIB)՝ այն նոր որակի ծառայություններ է ապահովելու ռուսական ֆինանսական ընկերությունների և օտարերկրյա ֆինանսական և ներդրումային կորպորացիաների համար։

Ռուսաստանի հակամենաշնորհային գործակալությունը 2011 թ–ի դեկտեմբերի 7–ին հաստատել էր «Տրոյկա Դիալոգ» ներդրումային ընկերության միավորումը «Սբերբանկ»–ին։ ՌԴ կառավարության վերահսկողության ծառայությունը անցյալ տարվա հոկտեմբերին իր հերթին նույնպես հաստատել էր խոշոր առևտրային բանկի և ներդրումային ընկերության միավորումը։ Հաղորդում է «Ռիա Նովոստի» լրատվական ծառայությունը։ 

Հիշեցնենք, որ 2011 թ–ի մայիսին, «Սբերբանկ»–ը պայմանագիր էր կնքել «Տրոյկա Դիալոգ»–ի 100% բաժնետոմսերը գնելու համար։ Համաձայն պայմանագրի՝ գործարքը պետք է տեղի ունենար երկու փուլով երեք տարվա ընթացքում։ Առաջին փուլում, որը պետք է ավարտվեր 2011 թ–ի հոկտեմբերին, բանկը ներդրումային ընկերությանը պետք է վճարեր 1 մլրդ դոլար գումար՝  100% բաժնետոմսերը գնելու համար։ Երկրորդ փուլը պայմանավորված է 2012–2013 թթ–ի ընթացքում ներդրումային ընկերության ձեռք բերելիք շահույթով։ 

«Տրոյկա Դիալոգ»–ը հիմնադրվել է 1991 թվականին՝ մասնագիտանալով արժեթղթերի շումայում՝ դրանց վաճառքի, ներդրումային բանկային գործարքների, ակտիվների հավատարմագրային կառավարման, մասնավոր ներդրումների և ֆինանսական գործարքներով։ «Տրոյկա Դիալոգ»–ն իր ներկայացուցչություններն ունի ինչպես Մոսկվայում, այնպես էլ աշխարհի 20 քաղաքներում՝ Նյու Յորքում, Լոնդոնում, Նիկոսիայում, Կիևում, Ալմա–Աթայում և այլն։ Ընկերության կառավարման խորհրդի նախագահն է ազգությամբ հայ՝ Ռուբեն Վարդանյանը։