ՍԱՏՄ-ում քննարկվել է Հայաստանում ՄԱԿ-ի Պարենի և գյուղատնտեսության կազմակերպության առաջարկած ծրագիրը

Սննդամթերքի անվտանգության տեսչական մարմնի ղեկավար Տիգրան Պետրոսյանն աշխատանքային հանդիպում է ունեցել Հայաստանում ՄԱԿ-ի Պարենի և գյուղատնտեսության կազմակերպության (ՊԳԿ) ներկայացուցիչ Ռայմոնդ Ելեի, ՊԳԿ ազգային ծրագրերի ղեկավար Զարուհի Բեգլարյանի և ՊԳԿ ծրագրի համակարգող Սերենա Պեպինոյի հետ։

 

Հանդիպման ընթացքում քննարկվել է ՊԳԿ-ի կողմից առաջարկվող նոր, հեռանկարային ծրագիր, որը կներկայացվի ՍԱՏՄ կարծիքին. տեսչական մարմինը կտրամադրի ճանապարհային քարտեզ և տեղեկանք կարիքների վերաբերյալ, որի վերլուծման արդյունքում ծրագրի ներդրումն ավելի թիրախավորված կլինի։

 

Խոսվել է ԵՄ և ԵԱՏՄ օրենսդրության ներդաշնակեցման մասին, ինչը մեծ նշանակություն կունենա տնտեսության զարգացման հարցում՝ խթանելով ԵՄ և ԵԱՏՄ շուկաներ բեռների արտահանումը:

 

Տիգրան Պետրոսյանը բարձր է գնահատել ՍԱՏՄ-ՊԳԿ համագործակցությունը և համատեղ իրականացված ծրագրերը, որոնք նպաստել են ՍԱՏՄ կարիքների բարելավմանը, մասնագիտական վերելքներին և այլն։

 

Կողմերն անդրադարձել են նաև կենդանիների առողջության, բուսասանիտարիայի, հակամանրէային կայունության դեմ պայքարի (AMR) և մասնագիտական հմտությունների բարելավման ոլորտներում համագործակցության հետագա քայլերին: Տեսչական մարմնի ղեկավարը խոսել է բուսասանիտարիայի զարգացման հարցում աջակցության իր ակնկալիքների մասին՝ ներկայացնելով այդ ոլորտի խոցելի կողմերը մեր երկրում։

 

Պարոն Պետրոսյանը հայտնել է իր պատրաստակամությունը նպաստելու ծրագրի իրականացմանը և կարևորել սկսված գործընթացների շարունակականությունը: