Մոնակոյում նշվեց Հայաստանի անկախության տոնը (լուսանկարներ)

Մոնակոյում  օրերս նշվեց Հայաստանի անկախության տոնը։ Միջոցառումը անցկացվեց Ֆրանսիայում և Մոնակոյում՝ Հայաստանի դեսպանության բարձր հովանու ներքո և գործարար Վրույր Փենեսյանի նախաձեռնությամբ։ Միջոցառման շրջանակում կազմակերպվեց բարեգործական համերգ Մոնակոյի Մայր տաճարում՝ ի աջակցություն Մոնակոյի Կարմիր Խաչի, որից հետո տեղի ունեցավ հյուրասիրություն։

Համերգին բացման խոսքով հանդես եկավ Ֆրանսիայում և Մոնակոյում Հայաստանի դեսպան Արման Խաչատրյանը, որից հետո ելույթ ունեցավ Մոնակոյի Կարմիր Խաչի ղեկավարության ներկայացուցիչը:

Միջոցառմանը ներկա էին Մոնակոյի արտաքին գործերի և համագործակցության հարցերով նախարարության ներկայացուցիչներ, Ազգային խորհրդի անդամներ, մշակութային և հասարակական գործիչներ, ինչպես նաև հայկական համայնքի ներկայացուցիչներ։

Վրույր Փենեսյանի խոսքով՝ հայ մշակույթի տաղանդավոր գործիչների՝ դաշնակահարուհի Նարեհ Արղամանյանի (Վիեննա), սոպրանո Անուշ Հովհաննիսյանի (Լոնդոն), տենոր Տիգրան Մելքոնյանի (Նապոլի) , մեցո-սոպրանո Սոֆիա Թումանյանի (Հռոմ ), դուդուկահար Արտյոմ Մինասյանի (Փարիզ) անզուգական կատարումները հիացրին հանդիսատեսին։ Նրանց շնորհիվ երեկոն լցվեց ջերմությամբ, հուզմունքով և հայ մշակույթի անքակտելի ոգով։ Համերգից հետո Արքայազնի պալատի տարածքին կից գտնվող ռեստորանում կազմակերպվել էր հյուրասիրություն, որտեղ  հյուրերը Շառլ Ազնավուրի երաժշտության ներքո վայելում էին հայկական կոնյակ և հյուրասիրություն։

1-ին լուսանկարում ՝ Մոնակոյի հայ համայնքի ներկայացուցիչ Վրույր Փենեսյանն ու Ֆրանսիայում և Մոնակոյում Հայաստանի դեսպան Արման Խաչատրյանն են։

2-րդ լուսանկարում Իրինա Բելիշեվան (Wilco ընկերություն ), Վրույր Փենեսյանն , սոպրանո Անուշ Հովհաննիսյանը (Լոնդոն), մեցո-սոպրանո Սոֆիա Թումանյանը (Հռոմ ), ՀՀ դեսպան Արման Խաչատրյանը, տենոր Տիգրան Մելքոնյանը (Նապոլի) և Նարեհ Արղամանյանը (Վիեննա)։ Նշենք, որ Վրույր Փենեսյանը հատուկ շնորհակալություն հայտնեց ԼՈՒՐԵՐ․COM-ին, ինֆորմացիոն գործընկեր ներկայանալու և միջոցառումը լուսաբանելու համար։

Միջոցառման գլխավոր գործընկեր Wilco կապիտալի կառավարման ընկերությունը, որն աջակցում է անհատներին և ձեռներեցներին խելամիտ կերպով կառավարել իրենց ունեցվածքը, կապեր հաստատեց սփյուռքի մեր հայրենակիցների հետ, ինչն էլ ևս կծառայի ի շահ Հայաստանի Հանրապետության։