Իշխանությունը, որն իշխանության է եկել հավաքների միջոցով, այսօր առավելագույնս սահմանափակում է հավաքների ազատությունը. իրավապաշտպան

Կարող ենք արձանագրել, որ հավաքների միջոցով իշխանության եկած գործող քաղաքական ռեժիմն ամենաշատն է սահմանափակել հավաքների սահմանադրական ազատությունը։ Այս մասին այսօր հրավիրված ասուլիսում հայտարարեց իրավապաշտպան Վահե Գրիգորյանը՝ հղում անելով Վենետիկի հանձնաժողովի որոշմանը, ըստ որի՝ ՀՀ քրեական օրենսգրքի 236-րդ հոդվածի 2-րդ մասը («հավաքին մասնակցելու նպատակով նյութապես շահագրգռելը») ոչ իրավաչափ է։

Նրա խոսքով՝ Վենետիկի հանձնաժողովը հստակեցրել է, որ օրենքի նման հոդվածը պետք է ունենա իրավական որոշակիության բավարար աստիճան, որպեսզի հասարակության ներկայացուցիչների և դրա հասցեատերերի համար պարզ լինի՝ որ գործողությունն է իրավաչափ, որը՝ ապօրինի։

«Այս դեպքում իշխանությունն այնպիսի կարգավորում էր մտցրել, որ հավաքի կազմակերպիչը, որը ողջամտորեն պարտավոր է կամ կարող է հոգալ հավաքի մասնակիցների կեցության, սննդի կամ այլ ծախսեր, այդ թվում տեխնիկական միջոցների ապահովման հարցեր, փաստացի հավասարեցվել էր հանցագործի։ Այսինքն՝ մարդիկ հետապնդվել են այնպիսի գործողությունների համար, որոնք լիովին տեղավորվում են հավաքի կազմակերպման իրավական հասկացության մեջ և չեն կարող դիտվել իրավախախտում, առավել ևս՝ հանցագործություն»,– ասաց իրավապաշտպանը։

Վահե Գրիգորյանի խոսքով՝ Վենետիկի հանձնաժողովի որոշումից տրամաբանորեն բխում է, որ իշխանություններն օրենքի անորոշություններն օգտագործել են որպես քաղաքական ընդդիմադիրներին ժամանակավորապես չեզոքացնելու միջոց։

«Սա Սահմանադրության և օրենքի տեսանկյունից ամենավտանգավոր մոտեցումն է, երբ օրենքը ծառայում է ոչ թե հասարակության շահին, այլ կենտրոնական քաղաքական ուժի շահերի սպասարկմանը և ընդդիմադիր քաղաքական ուժերին կամ անհատներին քաղաքական կյանքից հեռացնելու գործիք է դառնում»,- ընդգծեց նա։