Պատերազմից հետը բերած զենքերը թողել է Նուբարաշենի գերեզմանատան դարպասի մոտ․ ոստիկանության ամփոփումը

Ոստիկանությանը շարունակում է պայքարը բնակչության մոտ ապօրինի պահվող զենք-զինամթերքը հայտնաբերելու ուղղությամբ:

Քրեական ոստիկանության Երևան քաղաքի վարչության ծառայողների բացատրական աշխատանքի շնորհիվ հոկտեմբերի 30-ին Ոստիկանության օպերատիվ կառավարման կենտրոն զանգահարած քաղաքացին հայտնել է, որ պատերազմից հետը բերած զենք-զինամթերքը թողնում է Նուբարաշենի գերեզմանատան դարպասի մոտ։

Նշված վայրի զննությամբ հայտնաբերել են` «Կալաշնիկովի» երկու ինքնաձիգ, հակատանկային նռնակ, երկու ատրճանակ, երեք նռնակ` պայթուցիչներով, երկփողանի երկու հրացան, ինքնաձիգի երեք պահեստատուփ, տարբեր տրամաչափերի 381 փամփուշտ և հակաօդային պաշտպանության «Իգլա» համակարգի բաղկացուցիչ մասեր։

***

Քրեական ոստիկանության Արագածոտնի մարզային վարչության ծառայողների բացատրական աշխատանքի շնորհիվ հոկտեմբերի 30-ին 911 ծառայություն զանգահարած քաղաքացին հայտնել է, որ Նոր Երզնկա գյուղ տանող ավտոճանապարհին սպիտակ պարկի մեջ թողել է զենք-զինամթերք։

Հայտնաբերվել է «Կալաշնիկովի» երկու ինքնաձիգ, «Մակարով» տեսակի ատրճանակ՝ լիցքավորված չորս փամփուշտով, մեկ թմբուկավոր ատրճանակ, ինքնաձիգի երկու փամփշտատուփ, մարտական չորս նռնակ և 240 փամփուշտ:

***

Արդյունավետ էր նաև Քրեական ոստիկանության Գեղարքունիքի մարզային վարչության ծառայողների բացատրական աշխատանքը:

Հոկտեմբերի 30-ին Գեղարքունիքի մարզի Ճգնաժամային կառավարման կենտրոն զանգահարած քաղաքացին հայտնել է, որ Լճաշենի «Բերդի տակ» կոչվող հատվածում պատի տակ թողել է զենք-զինամթերք։

Հայտնաբերել է երկու պարկ, որոնց մեջ կար «Կալաշնիկովի» երկու ինքնաձիգ, որսորդական մեկ հրացան, երկու ատրճանակ, մարտական երկու նռնակ, նռնակի մեկ պայթուցիչ, ինքնաձիգի երեք պահեստատուփ՝ ընդհանուր 59 փամփուշտներով և տարբեր տրամաչափերի 129 փամփուշտ։

***

Հոկտեմբերի 30-ին Լոռու մարզի 9-11 ծառայություն զանգահարած քաղաքացին հայտնել է, որ պատերազմից բերած զենքը թողել է Վանաձորում` ուռենու տակ։
Լոռու քրեական ոստիկանները հայտնաբերել են «Կալաշնիկովի» երկու ինքնաձիգ, ակոսափող հրացան, մարտական երեք ատրճանակ, ինքնաձիքի երեք փամփշտատուփ, չորս նռնակ, նռնակի երեք պայթուցիչ, տարբեր տրամաչափի 113 փամփուշտ։

***

Նույն օրը նույն ծառայություն զանգահարած մի քաղաքացի էլ հայտնել է, որ պատերազմից բերած զենք-զինամթերքը թողել է Գյումրի-Հացիկ ճանապարհի պարսպի վերջնամասում։

Շիրակի քրեական ոստիկանները հայտնաբերել են «Կալաշնիկովի» մեկ ինքնաձիգ, 30 փամփուշտով լիցքավորված պահունակ, հինգ նռնակ՝ երեք պայթուցիչով և փամփուշտներ։

***

Հոկտեմբերի 30-ին Վայոց ձորի մարզի ճգնաժամային կառավարման կենտրոն զանգահարած քաղաքացին հայտնել է, որ պատերազմից բերած զենք-զինամթերքը թողել է Գետափ գյուղի վերջնամասում:

Համայնքային ոստիկանության Եղեգնաձորի բաժնից մեկնած խումբը հայտնաբերել է պոլիէթիլենային պարկ, որի մեջ կար որսորդական մեկ հրացան և տարբեր տրամաչափերի 31 փամփուշտ։

***

Հոկտեմբերի 30-ին Փրկարարական ծառայության Տավուշի մարզային վարչություն զանգահարած քաղաքացին հայտնել է, որ Իջևանում` «Չռչռ» անվամբ հայտնի տարածքում թողել է զենք-զինամթերք։

Քրեական ոստիկանության Տավուշի մարզային վարչության ծառայողները հայտնաբերել են մեկ ինքնաձիգ` վեց փամփուշտով լիցքավորված փամփշտատուփով, ականանետ, ակոսափող մարտական երկու հրազեն, մեկփողանի ողորկափող հրացան, ինքնաշեն հրացան, վառոդ, մեկ նռնակ` պայթուցիչով, ինքնաձիգի վեց փամփշտատուփ, 202 փամփուշտ և այլ զինամթերք։

***

Կրկին հիշեցնենք, որ ապօրինի պահվող զենք-զինամթերքը կամավոր հանձնողներն ազատվում են քրեական պատասխանատվությունից:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: