Վեդի խոշորացված համայնքի դեմ ներկայացված հայցերը հարուցվել են մինչև խոշորացումը․ Գարիկ Սարգսյան

Վեդիի համայնքապետ Գարիկ Սարգսյանը ֆեյսբուքյան իր էջում անդրադարձել է մամուլի հրապարակումներին և կից գրել․

«Վեդի խոշորացված համայնքի դեմ ՀՀ գլխավոր դատախազության կողմից ներկայացված հայցերը հարուցվել են նախկին ՀՀ Արարատի մարզի Գոռավան, Ուրցաձոր և Լուսառատ համայնքների տեղական ինքնակառավարման մարմինների կողմից նախկինում՝ մինչև խոշորացումը և իմ՝ համայնքի ղեկավար ընտրվելը, կատարված գործարքներն անվավեր ճանաչելու պահանջներով։

Հաշվի առնելով, որ Վեդի խոշորացված համայնքը հանդիսանում է Գոռավան, Ուրցաձոր և Լուսառատ համայնքների իրավահաջորդը, ուստի ՀՀ գլխավոր դատախազության կողմից հայցերը ներկայացվել են Գոռավան, Ուրցաձոր և Լուսառատ համայնքների իրավահաջորդ ՀՀ Արարատի մարզի Վեդի խոշորացված համայնքի դեմ (այսպես կոչված նախկիններից ժառանգություն ստացված գործեր)։

Ինչ վերաբերվում է այն գրառմանը՝ «Հայաստանում, որպես կանոն, ՔՊ-ականների ներկայացրած հայցերն արագությամբ քննվում են, իսկ նրանց դեմ ներկայացված հայցերը` տարիներով ձգձգվում», հայտնում եմ, որ ՀՀ գլխավոր դատախազության կողմից հարուցված հայցադիմումները վերաբերում են Գործարքի կողմերին՝ մասնավորապես Վեդի համայնքի իրավանախորդներին (նախկին ՏԻՄ-երին) և ֆիզիկական անձ հանդիսացող անձանց, ուստի գործերի քննությունը իրականացվում են օրենքով սահմանված կարգով և ժամկետներում՝ ապահովելով գործի քննության բազմակողմանիությունն ու օբյեկտիվությանը։

Իսկ վերջում կոչ եմ անում այն բոլոր լրատվականներին, ովքեր ժրաջան տարածել են սենսացիոն վերնագրերով այդ էժանագին հոդվածները, մի քանի րոպե տրամադրեն եւ պրոֆեսիոնալ լրագրությամբ զբաղվեն, իհարկե, եթե դա իրենց մոտ ստացվում է»։