Ռուսաստանում մեկնաբանել են Տոկաևի խոսքերը՝ Թրամփին «վերևից ուղարկված» անվանելու մասին

ՌԴ Պետդումայի պատգամավոր Կոնստանտին Զատուլինը նշել է, որ տարբեր երկրներ այսօր «մրցում են արևելյան խոսքի փառաբանությամբ»՝ փորձելով բարեհաճություն շահել ԱՄՆ նախագահի հանդեպ և խուսափել պատժամիջոցներից։ Այս մասին նա ասել է «Лента.ru»-ին տված հարցազրույցում՝ անդրադառնալով Ղազախստանի նախագահ Կասիմ-Ժոմարտ Տոկաևի վերջին հայտարարությանը։

Տոկաևը նախօրեին հայտարարել էր, որ Դոնալդ Թրամփը «վերևից ուղարկված մեծ պետական գործիչ է», որը վերադարձնում է «բարեխոհությունը» ամերիկյան քաղաքականություն։ Զատուլինի խոսքով՝ նման արտահայտություններ կարելի է դիտարկել որպես դիվանագիտական քայլ՝ ուղղված հնարավոր տնտեսական ճնշումներից խուսափելուն։

Պատգամավորը նաև ընդգծել է, որ Կենտրոնական Ասիայի երկրները, ներառյալ Ղազախստանը, փորձում են պահպանել հավասարակշռություն Ռուսաստանի, Չինաստանի և ԱՄՆ-ի միջև։ Նրա կարծիքով՝ այդ «խաղը մի քանի դաշտում» նրանց թույլ է տալիս պահպանել անկախության տպավորությունը՝ չխախտելով հարաբերությունները հիմնական ուժային կենտրոնների հետ։