Գիտնականները պարզել են էլեկտրոնային ծխախոտի անսպասելի առավելությունը սովորականի նկատմամբ

ԱՄՆ Կալիֆորնիայի համալսարանի գիտնականները պարզել են, որ էլեկտրոնային ծխախոտի օգտագործումը ՄԻԱՎ-ով վարակված մարդկանց համար կարող է ավելի անվտանգ լինել, քան սովորական ծխախոտ ծխելը: Աշխատանքը հրապարակվել է Ամերիկյան սրտի ասոցիացիայի (JAHA) ամսագրում:

Հետազոտողները ուսումնասիրել են աթերոգենեզի վաղ փուլերը՝ զարկերակներում ճարպերի և խոլեստերինի կուտակման գործընթացը, և պարզել են, որ էլեկտրոնային ծխախոտներն ավելի քիչ փոփոխություններ են առաջացնում, որոնք նպաստում են այդ գործընթացին քան ծխախոտը:

«Ծխելը շարունակում է մնալ Ամերիկայի Միացյալ Նահանգներում սրտանոթային հիվանդություններից կանխատեսվող մահվան գլխավոր պատճառը»,-նշել է ուսումնասիրության գլխավոր հեղինակը, սրտաբանը և Դևիդ Գեֆֆենի բժշկական դպրոցի բժշկության և ֆիզիոլոգիայի պրոֆեսոր դոկտոր Հոլլի Միդդլքոֆը:

«ՄԻԱՎ/ՁԻԱՀ-ով ապրող մարդիկ երկու-երեք անգամ ավելի հաճախ են ծխում, քան ընդհանուր բնակչությունը, ինչը մեծացնում է սրտանոթային բարդությունների վտանգը։ Մեր արդյունքները ցույց են տալիս, որ էլեկտրոնային ծխախոտի անցնելը կարող է լինել վնասի նվազեցման արդյունավետ ռազմավարություն այս խոցելի խմբի համար»:

Երեք օր շարունակ մասնակիցները պատահական կարգով ծխել են ծխախոտ, օգտագործել էլեկտրոնային սիգարետ կամ փչել դատարկ խողովակից: Յուրաքանչյուր սեսիայից առաջ և հետո գիտնականները վերցրել են արյան նմուշներ և արել էլեկտրոկարդիոգրամաներ՝ սրտանոթային համակարգի վրա ազդեցությունը գնահատելու համար: Ծխախոտները ցույց են տվել աթերոգենեզի զարգացման ամենավառ բացասական ազդեցությունը:

Ուսումնասիրության հեղինակների խոսքով՝ արդյունքները ցույց են տալիս, որ անհրաժեշտ են ավելի լայնածավալ կլինիկական փորձարկումներ՝ էլեկտրոնային սիգարետների օգտագործման հետ կապված սրտանոթային ռիսկերի ուսումնասիրության համար ՁԻԱՀ ունեցող մարդկանց մոտ:

«Եթե էլեկտրոնային սիգարետներին անցնելը կօգնի բավարարել նիկոտինային կախվածությունը և միաժամանակ նվազեցնի սրտի նոպաների ռիսկը ՁԻԱՀ ունեցող մարդկանց մոտ, դա կլինի կարևոր քայլ ծխելուց վնասի նվազեցման ռազմավարությունում»,-հավելեց Միդդլքոֆը:

Թարգմանությունը՝ Lurer.com-ի