Բաքվում սպասում են հայ-ադրբեջանական սահմանից եվրադիտորդների հեռանալուն

Մենք սպասում ենք հայ-ադրբեջանական սահմանից եվրադիտորդների հեռանալուն: Այս մասին հայտարարել է Ադրբեջանի արտգործնախարարության խոսնակ Այխան Հաջիզադեն:

Նրա խոսքով՝ Ադրբեջանը բազմիցս լուրջ մտահոգություն է հայտնել Հայաստանում ԵՄ առաքելության գործունեության վերաբերյալ, որը «հակասում է Բաքվի և Երևանի միջև ձեռք բերված պայմանավորվածություններին»։

«Իր հայտարարած նպատակներին՝ տարածաշրջանային կայունության խթանմանը և Ադրբեջանի ու Հայաստանի միջև վստահության ամրապնդմանը հակառակ, առաքելությունը փաստացի օգտագործվել է որպես հակաադրբեջանական քարոզչության գործիք», - ընդգծել է Հաջիզադեն։

Նա նշել է, թե Բաքուն պնդել և հասել է նրան, որ հայ–ադրբեջանական սահմանին երրորդ կողմի ուժերի տեղակայման արգելքը ներառվի որպես խաղաղության համաձայնագրի հիմնական դրույթներից մեկը։

«Երրորդ կողմի ուժեր ասելով մենք, ի թիվս այլ բաների, նկատի ունենք նաև Եվրամիության առաքելությունը։ Մեր դիրքորոշումը հայտնի է Հայաստանին։ Մենք հույս ունենք, որ խաղաղության պայմանագրի ստորագրումից հետո Հայաստանը կկատարի իր պարտավորությունները այս հարցում», - հավելել է արտաքին գործերի նախարարության ներկայացուցիչը։

Հիշեցնենք, որ ավելի վաղ Փաշինյանը հայտարարել էր, որ խաղաղության պայմանագրի ստորագրումից հետո սահմանին ԵՄ առաքելության ձևաչափը կփոխվի։