Եվրահանձնաժողովը չի կարողացել համոզել Բելգիային օգտագործել Ռուսաստանի սառեցված ակտիվները

Եվրոպական հանձնաժողովին չի հաջողվել հասնել համաձայնության Բելգիայի հետ՝ Ռուսաստանի սառեցված ակտիվները Ուկրաինային վարկի ձևով տրամադրելու հարցում։ Belga գործակալության տվյալներով՝ ԵՀ-ն առաջարկել էր օգտագործել Euroclear բանկում պահվող շուրջ 140 միլիարդ եվրոն՝ որպես վարկային աջակցություն Կիևին, որը պետք է վերադարձվեր պատերազմից հետո՝ ռուսական հնարավոր փոխհատուցումների հաշվին։

Բելգիան, սակայն, մերժել է այս տարբերակը՝ մատնանշելով իրավական և ֆինանսական լուրջ ռիսկեր։ Թեև քննարկումները, ըստ ԵՀ-ի, եղել են «կառուցողական», դրանք չեն փարատել Բելգիայի մտահոգությունները, իսկ առաջարկը, ըստ պաշտոնական Բրյուսելի, դիտվում է որպես վտանգավոր նախադեպ։

Ավելի վաղ հաղորդվել էր, որ եթե ԵՄ երկրները չհասնեն համաձայնության ռուսական ակտիվների օգտագործման հարցում, ապա Ուկրաինային տրվելիք 140 միլիարդ եվրոյի վարկի տոկոսային վճարումները ստիպված կլինեն կատարել հենց եվրոպական երկրները՝ տարեկան մինչև 5,6 միլիարդ եվրոյի չափով։